40 ka balay naugdaw

CEBU, Philippines - Miulbo ang dakong sunog kagahapon sa hapon kini bisan paman sa pagbunok sa kusog nga uwan diha sa sitio Mahayahay A. Lopez barangay Calamba dakbayan sa Sugbo samtang usa ka fire investigator ang napaso.

Si Cebu City fire marshall William Tacaldo, mipadayag nga si SFO1 Omar Segovia nakaangkon og first degree burn human kini matagaki og baga gikan sa mga nasunog nga mga panimalay.

Si PO2 Eric Arnido sa San Nicolas Police Station miingon nga base sa impormasyong nadawat gikan sa kabomberohan gibanabanang 40 ka panimalay ang nangasunog.

Apan wala pay kompirmasyon niini ang kabomberohan ngadto sa mga tigbalita.

Matud pa ni Tacaldo nga nadawat nila ang maong alarma alas 3:39 sa hapon ug nakontrolar ang maong sunog nianang pagka alas 4:17 na.

Giisa na ngadto sa Task Force Alpha ang maong sunog tungod sa kadaling mikatap ang maong sunog sa mga nagtapok ug nagdikit nga mga panimalay.

Usa sa mga nasunogan nga si Geraldine Pepito, nagkanayon  nakamata siya sa kainit nga gibati ug sa iyang pagsusi sa gawas nakit-an niya  ang balay sa silingan nga si Panping Rama  nasunog na hinungdan nga misinggit siya og sunog.

Samtang si Amay Bolambao nga apil sa nasunogan nagkanayon nga wala gyud siya’y nabitbit bisan usa sa ilang mga butang tungod kay naligo siya sa uwan niadtong tungora.

Sama sa gihapon, naglisod ang mga bombero pagsulod sa fire scene tungod sa kahagip-ot sa lugar ug duna na usab dead end nga dalan.

Kahinumduman nga sa milabay’ng semana, nahitabo usab ang dakong sunog diha sa may A. Lopez diin dunay magtiayon nga napaig. (Lesley Caminade-Vestil/EIM) (BANAT NEWS)