Negosyante’g baboy gitulis sa mga nagmotor

CEBU, Philippines - Gitulis sa duha ka nagmotor nga armadong tulisan ang usa ka negosyante og baboy samtang paingon unta kining mangompra diha sa barangay Pangdan siyudad sa Naga niadtong Miyerkules sa alas 9:00 sa buntag.

Ang biktima mao si Dominador Pantonial,38, nagpuyo sa barangay Inayagan Naga City ug mamalitay og mga baboy nga iyang itumod sa kamerkadohan.

Matud pa ni PO1 Nino Cabaron sa Operations Branch sa Cebu Provincial Police Office, ang biktima nagmotor gikan sa barangay Naalad paingon unta kini sa barangay Uling Naga aron sa mamalit og baboy.

Apan pag-abot sa maong lugar kalit siyang gibabagan ug gipara sa duha ka mga lalaki ug kalit nga mition og armas dayong deklarar og tulis.

Tungod sa kahadlok, wala na mosukol ang biktima dihang gikuha ang iyang bag nga may sud nga P18,000. Ang mga tulisan daling miikyas palayo sa dapit samtang igo nalang sa pagsumbong sa kapolisan ang biktima.  (/EIM) (BANAT NEWS)