10 ka barangay kapitan sa lalawigan mulingkod isip konsehal

CEBU, Philippines - Napulo ka barangay kapitan sa lalawigan sa Sugbo ang makalingkod pa og pipila ka buwan isip konsehal sa ilang lungsod ug syudad sa dili pa ang eleksiyon sa barangay karong Oktubre.

Ang maong mga kapitan maoy mga bise-presidente sa  ilang Association of Barangay Councils (ABC) kansang mga presidente napili sa miaging eleksiyon isip konsehal samtang tulo napiling bise-mayor.

Nunot sa ilang paglingkod unya isip bag-ong presidente sa tagsatagsa nila ka ABC ug konseho sa lungsod ug syudad, apil usab sila nga mopili sa mamahimong pangulo sa Philippine Councilor’s League (PCL)-Cebu chapter kung diin ang mapiling presidente molingkod isip sakop sa Hunta         Probinsiyal.

Sila mao si Aurelio Alinsonorin sa dakbayan sa Naga, Samuel Frondoso sa Oslob, Paciano Ong sa Santander, Pio Yurango sa dakbayan sa Bogo, Julia Mansueto sa Madridejos, Iluminado Ornopia sa San Remigio, Juanito Cantero sa Liloan, Delfin Bensig sa San Francisco, Crispin Retiza Jr. sa Sogod ug Noel Sano sa        Tudela.

Hinoon magpaabot pa sila sa kompirmasyon sa Liga ng mga Barangay (LnB) National Executive Board.

Matud pa ni Bokal Jose Ribomapil Holganza Jr. kinsa maoy pangulo sa Federation of ABC sa lalawigan sa Sugbo nga dili awtomatik makalingkod ang mga bise-presdente sa katungdanan kung wala’y kompirmasyon.

Giduso na sa FABC-Cebu ang resolusyon nga nag-awhag sa LnB NEB sa pagkompirmar sa napulo ka bise-presidente sa ABC aron makalingkod na sa katungdanan karong buwan sa Hulyo.

Gawas sa napulo ka pangulo sa ABC, 35 pa ka dugang kapitan sa lalawigan sa Sugbo ang napili sa mas taas nga katungdanan sa miaging eleksiyon sa Mayo 13 nga mao sila si bise-mayor Allan Arquillano sa San Francisco, Greman Solante sa Tudela ug Poblacion barangay kapitan Floreto Batayola sa Madridejos.

Ubang pangulo sa ABC nga napiling konsehal mao sila si Jose Brainard Mayol sa dakbayan sa Bogo, Leo Salundaguit sa Liloan, Doroteo Dorimon sa Madridejos, Virgilio Chiong sa dakbayan Naga, Nenita Filosofo sa Oslob, Condrado Loon sa San Remigio, Juanito Puspus sa Santander, ug Ricardo Vanguardia sa Sogod. (/EIM) (BANAT NEWS)