60 ka pumpboats gipang-apud-apod sa Santander
CEBU, Philippines - Gipangapod-apod na kagahapon sa lokal nga kagamhanan sa lungsod sa Santander ang 60 ka pumpboats nga gisaad sa lokal nga kagamhanan sa Santander nga 200 ka mga susama niining sakyanan sa dagat ngadto sa mga gagmay’ng mananagat.
Diha mismo sa turnover ceremony sila si Gov.-elect Hilario Davide III, re-elected Bise-Gob. Agnes Magpale, Kong. Wilfredo Caminero sa segundo distrito ug Bokal Peter John Calderon.
Ang administrasyon ni Mayor Marilyn Wenceslao ug anak nga si Bise-Mayor Wilson Wenceslao daan nang misaad nga mohatag og 200 ka mga pumpboats ngadto sa 200 ka gagmay’ng mananagat sa ilang lungsod.
Matud pa sa municipal planning and development coordinator, Engr. Jonathan Buscato, nga 60 pa lang ang unang nahatag tungod kay padayon pang gihimo ang kapin usa ka gatos nga kasko.
Apan napalit nang daan ang laing usa ka gatos ka makina alang niini.
Kini gipundohan og dul-an sa dos milyones pesos alang sa pagpalit og 160 ka makina gikan sa pundo nga hinatag ni Senador Aquilino “Koko†Pimentel III. Samtang ang kuwang nga 40 ka pumpboats pangitaan pa og pundo.
Samtang ang gigasto sa pagpahimo sa kasko sa 60 ka mga bangka gikan sa pundo nilang Magpale, Caminero ug anak nga si Bokal Aladin Wilyamie, ug Calderon.
Matud pa ni Buscato nga way obligasyon ang mga mananagat sa pag-angkon niini, apan kinahanglang mosunod sila sa kasabutan nga mahimo kining gamiton panahon sa emerhensiya, dili gamitong pasaheroan ug kinahanglang ilaha kining i-maintain.
Ang mga nalista nga lehitimong gagmay’ng mananagat gikan sa napulo ka coastal barangays gipasalig ni Buscato nga makadawat gyud sa maong mga pumpboats. (BANAT NEWS)
- Latest
