Tulo ka ‘drug pushers’ sa Balamban nadakpan
CEBU, Philippines - Ubay-ubay nga pakete sa shabu, nagkadaiyang drug paraphernalia ug usa ka revolver ang nakuha sa kapulisan sa Balamban gikan sa tulo ka mga gituohang tigpayuhot og ginadiling drugas sa managlahing operasyon sa miaging adlaw sa Sitio Sam-ang, Barangay Pondol.
Ang mga suspek nagpuyo sa usa lang ka compound apan ang kapulisan misikop og una kang Rancito “Ranci†Tapdasan, 40, sa usa ka buy-bust operation ala 1:20 sa kaadlawon.
Ang operasyon gipanguluhan ni Chief Insp. Richard Oliver, armado sila og search warrant nga giluwatan ni Regional Trial Court Judge Hermes Montero, Branch 59 sa dakbayan sa Toledo kabahin sa pagpamaligya og illegal nga drugas ni Tapdasan.
Ginamit ang usa ka police poseur buyer, napalitan gyud og usa ka pakete sa shabu ang suspek bugti sa P300 nga maoy hinungdan sa pagkasikop ni Tapdasan.
Dugang nakuha sa maong operasyon ang 14 ka lain pang pinaketeng shabu, drug paraphernalia, ug P250 cash. Si Tapdasan giingong level two nga drug pusher. Kalapasan sa Sections 5 ug 11 sa RA 9165 ang ipasaka batok sa suspek.
Sunod nga gironda sa kapolisan ang giabangang lawak ni Richard “Esat†Mamac, 32 ug sa live-in partner niini nga si Felen Rose Flores, 28.
Ang maong kwarto gibana-bana nga mga lima ka metros lang ang gilay-on gikan sa gipuy-an ni Tapdasan.
Ang maong pagpangronda sa gipuy-an sa duha gibase sa search warrant nga kapalasan sa RA 9165 nga giluwatan gihapon ni Regional Trial Court Judge Hermes Montero, Branch 59 sa Toledo City.
Matud ni Oliver nga nasakpan gyud nila ang suspek nga naghan-ay pa sa shabu niini. Nakuha sa kapulisan ang unom ka gagmay’ng pakete sa shabu, drug paraphernalia, ug usa ka .357 nga revolver nga adunay upat ka mga bala ug P507 nga kwarta.
Si Oliver midugang nga si Mamac kanhi miyembro sa Balamban Traffic Management Office apan gitangtang kini.
Kaso sa paglapas sa Sections 11 ug 12 sa RA 9165 ang ipasaka batok kang Mamac samtang laing kaso nga Section 11 sa RA 9165 ang ipasaka usab batok kang Flores. (BANAT NEWS)
- Latest
