Bag-ong kuwartang papel gipaila sa BSP
CEBU, Philippines - Gisabwag sa unang higayon sa mga tinugyanan sa Bangko Sentral ng Pilipinas (BSP) pinaagi sa kahanginan ang kasayoran bahin sa salaping Filipinhon karon aron kalikayan sa publiko ang pagkalinlang gikan sa mga mini nga mga salapi.
Kini ang gibutyag ni Atty. Lux T. Bercelis, Regional Director sa BSP7 atol sa Kapihan sa PIA nga gipalanog sa DYMR Radyo ng Bayan kagahapon sa buntag.
Matud ni Bercelis nga gumikan sa mga programa nga New Generation of Philippine Banknotes, angay masayud ang katawhan nga ang mga materyales karon sa salaping Filipinhon gipili pag-ayo sa mga gitahasan sa kagamhanan alang sa maong gimbuhaton.
Miingon si Bercelis nga gikan sa papel, kolor, ug mga hulagway nga anaa sa maong mga salapi maoy nahimong numero uno sa tanang matang salapi nga gigama sukad niadtong Disyembre 2010 sa tibuok kalibotan. Ang salapi karon sa nasud may duha ka matang o klase nga mao ang new design ug ang new generation.
Miingon si Bercelis nga ang new design may 20 anyos na ang gidugayon, nga may denomination gikan sa P20, P50, P100, P200, P500, ug P1,000.
Kining new design molungtad na lang og mga duha ngadto sa tulo ka tuig ug ma-demonitize na, sumala ni Bercelis.
Samtang ang new generation sa mao gihapong denominasyon gilusad sa nasud niadtong Disyembre 2010 ug wala pa hisayri kun kanus-a kini ilisi tungod sa kamahal usab sa gastohon sa kagamhanan matag higayong mopagama kini og bag-ong klase sa salapi.
Samtang si Alazel JC Arante, Bank Officer I, sa BSP Cebu miingon nga aron kalikayan sa publiko ang pagkalingla sa mga mini nga kuwarta, kinahanglang aninawon gyud pag-ayo ang salapi una kini dawaton.
Iya usab nga giawhag ang publiko nga sa higayong makadawat og mini nga salapi kinahanglang pugngan ug ihatud ngadto sa BSP aron mapugngan ang pagsabwag niini.
Gani usa kini sa hinungdan nganong giilisan na ang desinyo sa kuwartang Filipinhon karon, sumala ni Arante. (BANAT NEWS)
- Latest
