Nadasmagan sa motor patay

CEBU, Philippines - Patay nang nahiabot  sa tambalanan ang 75 anyos nga senior citizen  nga nadasmagan og motorsiklo sa iyang paglabang  sa karsada didto sa highway sa barangay Sema, sa lungsod sa Dumanjug  niadtong Lunes sa alas 6:30 sa gabii.

Ang biktima nga dead on arrival (DOA) sa Barili District Hospital mao si Lorenzo Noel, 75, minyo, ug nagpuyo ra sa maong lugar.

Samtang ang nakadasmag  kaniya mao ang motorsiklo nga gimaneho sa usa ka Ronie Taculoy, 24, ulitawo, ug molupyo sa barangay  Cogon, Dumanjug.

Si PO3 Dionisio Tagupa sa Dumanjug Police  Station nga  nahinabi sa Banat News  nagkanayon  nga   ang motorsiklo  kusog  nga nagdagan paingon sa   lungsod proper dihang ang  biktima walay pagpakabana  ug  walay  lingi-lingi  nga mikalit  og  labang  sa karsada. Wala na makapugong  sa preno  ang  sakyanan  ug nadasmagan gyud ang   biktima.

Tungod  sa kakusog  nabalintong  kini   taliwala  sa karsada  samtang  ang  motorsiklo   nalamba   usab  ug nasalibay   sa  pipila ka metros ang drayber niini.

Ang  suspek  ug  ang  biktima pulos gitabang sa mga tawo nga nakasaksi  sa maong hitabo sa  maong  lugar ug gihatud nila  sa Barili District Hospital.

Apan ang biktima gideklarar sa mga doctor nga patay nang nahiabot  didto tungod sa grabing kadaut sa ulo ug mga samad ug bali sa ubang bahin sa lawas.

Samtang ang drayber sa motorsiklo gihulagway usab kini nga kritikal kon 50/50 ang kahigayonan nga maluwas,  busa  dali usab  kining gibalhin  ngadto  sa  Vicente Sotto Memorial Medical Center  (VSMMC ) sa dakbayan sa Sugbo. (BANAT NEWS)