Tulo gipasanginlang nakailad og P15 milyones
CEBU, Philippines - Gipasakaan kagahapon og kasong syndicated estafa ang tulo ka suspects nga nadakpan sa National Bureau of Investigation (NBI)-7 niadtong Biyernes sa usa ka entrapment operation.
Si Guillerma Lim, nga taga 1160 V. Rama Avenue, Guadalupe, Cebu City mibutyag nga nailad siya sa grupo og kapin sa P15 milyones.
Ang mga suspek mao sila si Jacquiline Guerrero, taga Barangay Malabang, Parang, Agono, Rizal ug ang magtiayong Arthur ug Fe Pigon, pulos residente sa Sitio Tugasan, Guadalupe, Cebu City. Si Fe, maoy bayaw ni Guerrero nga principal sa usa ka private school ug kanhi nagtrabaho isip researcher sa natad sa medisina. Matud ni Lim nga una pa nahitabo ang entrapment operation niadto siya sa buhatan sa NBI aron mangayo og panabang kabahin sa modus sa mga suspetsado.
Giingong nailad siya ug napabayad og P15, 424,400 sa mga suspetsado pinaagi sa ilang mga pagpangilad aron paliton ang usa ka luna nga duna pa diay pending nga kaso didto sa Korte Suprema. Si Guerrero nagpaila nga usa ka doctor of medicine nga espesyalista OB-Gyne ug mipahibalo kang Lim nga naa siya’y sinunod nga luna gikan sa ilang namatay nga apohan didto sa Tacloban City.
Tungod sa kamaayo motabi ni Guerrero, matud niya nga nakombinsir siya og mi-execute og special power of attorney pabor sa suspetsado nga maoy morepresentar kaniya sa korte ug sa pagbaligya sa maong luna.
Ang maong kwarta gigamit sa pag-proseso sa mga dokumento, real estate taxes, attorney fees ug litigation expenses.
Ang 12 ka ektaryang luna kasamtangang giokupar sa Unimaster Conglomeration Corporation Inc. tungod kay under protest kini ug ang maong kaso pending pa sa Supreme Court kung si kinsay tinud-anay nga tag-iya niini.
Ang entrapment operation nahitabo sa sud sa balay sa complainant alas 9:00 sa buntag pinangulohan ni Supervising agent Renan Oliva. Atol inquest proceeding, ang mga suspetsado mipadayag nga dili sila mo-file og counter-affidavits ug ilang atubangon ang kaso sa korte. Gihimakak usab sa magtiayon ang pasangil samtang si Guerrero nagkanayon nga iyang tubagon ang kaso sa korte. (BANAT NEWS)
- Latest
