Managsilingan nag-unay og linubaay naangol

CEBU, Philippines - Gidudahan  nga nagkasuyaay  ang  duha ka grupo hinungdan  nga  nag-unay og  linubaay  ang managhigala  nga  managsilingan  sa usa ka disco  party  didto  sa barangay  Sabang, isla  sa Olango sa miaging  Domingo  sa gabii.

Ang  mga biktima mao si Sonny Boy Sullano, 20, ug  si Jeric Apa, 20, pulos ulitawo,   ug silingan   nga suod  nga  managhigala  ang  duha  sa maong  dapit.

Sa pasiunang imbestigasyon ni PO2 Alfredo Macabudbod Jr.  sa Station 1 sa kapolisan sa Isla sa Olango nasayran nga samtang  nag- disco sa maong dapit alang  sa nagsingabot nga pista,  ang managhigala pulos  hubog nga nagkaabot sa diskohan.

Pipila ka gutlo mitumaw ang panaglalis sa duha  nga  misangpot  sa unang  pagdunggab ni Apa ngadto ni Sullano  nga migamit   sa iyang icepick.

Wala makabantay si Apa nga  adunay kutsilyong dala si Sullano nga mao usad ang gigamit niini pagdunggab ngadto ni Apa.

Si Sullano samaran sa iyang liog ug tiyan, samtang si Apa samaran sa iyang tiyan  ug ang duha dali nga gihatud ngadto  sa tambalanan sa dakbayan sa Lapulapu luwan sa sea ambulance gikan sa maong isla.

Si Sullano kritikal ang kahimtang, samtang si Apa anaa na  sa luwas nga kahimtang sulod sa Lapulapu City hospital.

Nagduda ang kapolisan nga nagpasuyaay  ang duha  ka  grupo nga  gipasakopan  ni Sullano  ug Apa  nga  maoy hinungdan sa maong hitabo .

Ang  ilang masigkauban  igo  lang  nagtan-aw  sa  duha  nga  naghinansakay  na  sa ice pick  ug  kutsilyo.

Hinuon   kining  tanan  naggumikan   sa ilimnong makahubog atol sa maong kalihukan, sumala sa kapolisan. (/WC) (BANAT NEWS)