Mayor Aljun mag-presidente sa LMP

CEBU, Philippines - Si Tuburan Mayor Aljun Diamante mao karon ang posibling  itugpo sa Liberal Party (LP) ni Presidente Benigno Aquino III alang sa pagka- Presidente sa League of Municipalities ( LMP) Cebu chapter atbang ni LMP President nga si Dumanjug Mayor Nelson Garcia sa One Cebu.

Gipahibawo ni Mayor Diamante atol sa interview sa Bantay Radyo ang iyang tinguha nga magpapili pagka presidente sa LMP atbang ni Mayor Garcia nga maguwang ni outgoing governor Gwen Garcia.

Apan giklaro ni Mayor Dimante nga nagpaabot pa siya karun sa pormal nga endorsement ni Governor elect Helario Junjun Davide III nga moasumir sa katungdanan karong  Hulyo 1.

Matud niya nga niadtong pagkahuman sa 2010 election , gituboy   na  siya  ni anhing vice governor Greg Sanchez Jr ug ni Davide nga maoy pakandidatuhon sa LMP atbang ni Garcia sa One Cebu.

Apan niadtong higayuna matud ni Mayor Diamante dili pa siya preparado tungod kay mao pay iyang pagdaug  isip mayor. Hinuon karon  andam  na  siya  sa maong katungdanan hinungdan nga  maingon  nga  tukma na  kining  higayona   sa  iyang pagtuman  sa maong  tanyag.

Dugang ni Mayor Diamante nga sa milabay’ng Domingo sa gabii adunay pipila ka mga mayor nga sakop sa One Cebu ang iyang gipakigtagboan ug mipadayag kini og suporta kaniya.

Apan wala hinganli niya ang  maong  mga  mayor   ug asang lungsora sila  sa   lalawigan sa Sugbo.

Gawas niini gipaabot  usab ni Diamante ang hugot nga suporta sa mga mayor sa LP human unya siya makakuha og endorsement ni Governor elect Davide. (/WC)  (BANAT NEWS)