Kasambahay Law angay ipahibalo sa tanan

CEBU, Philippines - Ang Department of Labor and Employment (DOLE-7) uban sa multi-agency group molusad og kampanya kalabot sa pagpausbaw sa bag-ohay pa lamang naaprobahan nga "Kasambahay Law".

Matud pa ni Chona Mantilla, Regional Executive Director sa DOLE 7 nga sa sunod bulan molusad sila og usa ka information campaign aron maabot gayud ngadto sa tanang katabang ug usab sa mga amo kining maong balaod.

Gipadayag ni Mantilla nga niadtong bag-o pa nga naaprobahan ang Kasambahay Law, aduna nay daghang nagpakabanang mga katabang ang mipakita ngadto sa ilang opisina.

“We already have complaints and queries raised that’s why there is a need first for everyone to be informed, there are still certain gray areas that’s why this is a developmental approach,”  matud pa ni Mantilla.

Samtang sa bahin ni Maria Nancy Abad nga staff usab sa DOLE 7, siya miingon nga ilang gihatagan ang national government agencies ug usab ang ubang sektor sa responsibilidad niini kalabot sa kalampusan sa implementasyon sa RA 10361.

Si Abad maoy nanguna sa Prevention group nga naglangkob sa mga ahensya ug mga sektor kinsa nahilakip sa adbokasiya ug pagpakatap sa impormasyong may labot sa maong balaod.

Matud ni Abad  nga lakip na  niini  ang Department of Interior and Local Government (DILG), Department of Education (DepEd), Philippine Information Agency (PIA), Social Security System (SSS), PhilHealth, Pag-ibig Fund, ug uban pa.

Nalakip usab ang Visayas Forum ug ang Samahan ng mga Manggagawang Pantahanan ng Pilipinas (SUMAPI) nga usa ka non-government organization.

Ang maong mga grupo nakadisider nga magtinabangay sa pag-umol og usa ka binisaya nga info materials kalabot sa Kasambahay Law.

Ang giisip  nga kasambahay naglakip sa katabang sa panimalay, yaya, cook, gardener, laundry persons ug usab mga batan-on nga indibidwal nga nanarbaho isip domestic helpers kinsa nagpanuigon og 15 anyos apan ubos sa 18-anyos ang panuigon kinsa matag adlaw nga nanarbaho isip domestic worker. (BANAT NEWS)