Binghay miawhag ginikanan motudlo’g relihiyon sa anak

CEBU, Philippines - Ang Episcopal vicar sa Archdiocese Cebu Monsignor Esteban Binghay miawhag sa mga ginikanan sa pagpalig-on sa family catechesis ngadto sa ilang mga anak.

Matud ni Binghay nga ang evangelization magsugod gyud kini sa tagsatagsa ka mga panimalay, maoy hinungdan  nga  daku gyud ang role sa mga ginikanan niini.

Iya  usab  nga  gisugyot  ang handbook of family catechesis nga binisaya aron  mas masabtan gyud pag-ayo  sa mga ginikanan kung unsa ang itudlo sa ilang mga anak.

“Sa una gitudluan sa atong mga misyonaryo ang mga ginikanan og una, aron  sila na usab ang motudlo sa ilang mga anak. Apan karun, wala naman kini gihimo sa kasagaran sa mga ginikanan ug magsalig na lang sa simbahan,” matud pa ni Binghay.

“This should be an on-going affair, to teach the children while they are still young because faithfulness begins at home,” dugang niya.        Nanghinaot si Binghay nga samtang wala pa ang handbook, unta itudlo sa mga ginikanan ngadto sa ilang mga anak kung unsa usab  ang gitudlo sa simbahan.      

Matud ni Binghay,  nga tungod sa pagkawala sa pagbansay-bansay sa mga ginikanan ug sa mga tawo niining  family catechesis, daghan nang mga balaud nga gipasar nga sukwahi sa balaud sa Ginoo. “The lack of family catechesis might also be one of the reason why ordinances against life was passed, evangelization within the family was no longer practiced,” matud pa niya.  (Marigold P. Lebumfacil/WC)     Candulawan tukora’g bag-ong school building

Ni Brenda Batuto

Dugang 19 ka mga classroom ang gikatakdang tukoron diha sa Candulawan Elementary School sa barangay Candulawan, dakbayan sa Talisay, matud ni Talisay City Department of Education (DepEd) Superintendent Woodrow Denuyo.

Si Denuyo mibutyag nga sulod niining buwana ang pagpatukod og bag-ong mga classroom diha sa maong tunghaan tungod kay naabot na ang Sub-Allotment Released Order (SARO) nga P22 milyones gikan sa national nga buhatan sa DepEd.

 Ang maong kantidad bahinon sa Candulawan Elementary School ug Pooc National High School ug Vicenta A. Manreal Memorial Elementary School (VAMMES). Ang Pooc National High School naa kini mahimutang sa VAMMES.

Ang Candulawan Elementary School duna kini sobra sa P11 milyones sa maong budget ug ang Pooc National High School ug VAMMES duna usab kini sobra sa P11 milyones nga bahin sa budget.

Gawas sa nahisgutang budget ang VAMMES ug Pooc National High School (PNHS) makadawat usab og P210 mil nga budget alang sa soil testing ug ang Candulawan Elementary School makadawat usab og samang kantidad.

Gibutyag ni Denuyo nga niadtong Disyembre sa milabay’ng tuig napahigayon na ang bidding alang sa katukoran sa siyam ka mga classrooms diha sa Candulawan Elementary School.

Gikatakdang sulod niining buwana sugdan na ang construction sa siyam ka mga classroom ug gilaumang mahuman kini sulod sa upat ka buwan.

Sa kapin P11 milyones nga budget tulo ka andanang building nga langkuban sa siyam ka mga classroom ang tukoron diin tulo niini ang okupahan sa high school sa Candulawan.

Matud usab ni Denuyo nga gawas niini ang Department of Public Works and Highways (DPWH) gikatakda usab nga motukod og usa ka building nga langkuban sa upat ka mga classroom.

Ug laing unom ka classrooms usab ang tukoron diha gihapon sa maong tunghaan aron iilis sa nangasunog nga mga classroom atol sa graduation day niadtong bulan sa Marso.

Gibutyag ni Denuyo nga nangayo usab sila ngadto sa national nga buhatan sa DepEd og puli sa mga classroom nga nasunog.

Ang budget niini gikan sa Quick Response diin gipasabot niya nga ang DepEd duna sa maong budget alang sa dinalian nga proyekto sama sa paghulip og mga classroom nga nasunog.

Apan bisan pa og wala masunog ang mga classrooms ang DepEd Talisay nagplano nang daan pagtukod og laing mga classrooms diha sa Candulawan tungod kay ang ubang mga classrooms sa maong tunghaan karaan na kaayo ug nagsaka usab ang mga estudyante.

Samtang wala pay pahibalo si Denuyo kun kanus-a usab gamiton ang bahin sa VAMMES ug PNHS. (BANAT NEWS)