Estudyante gipatay, kauban naangol sad

CEBU, Philippines - Patay diha-diha ang usa ka tinun-an samtang samaran usab ang higala niini human sa nahitabong pagpamusil diha sa sitio Rising Villagonzalo sa barangay Tejero pasado alas 3 kagahapon sa kaadlawon.        

Ang namatay nailhan nga si Melvin Laureo, 22, kinsa naigo sa iyang tuong abaga ug buko-buko samtang ang samaran mao si Ejemar Gantalao, 19, naigo sa iyang bukton walang bahin sa kilid sa lawas.         

Sa inisyal nga imbestigasyon sa kapolisan nasayran, nga ang duha ka biktima nagbaklay foot bridge sa maong dapit dihang kalit silang girakrakan sa wala mailhing mamumuno nga nagsunod kanila.          

Si Laureo, patay diha-diha, samtang si Gantalao, daling gidala sa Cebu City Medical Center ug gipaubos sa operasyon.         

Ang inahan ni Laureo nga si Liza, mipadayag nga ang iyang anak kanhi sakop sa usa ka fraternity nga wala masayri ang ngalan sa grupo.         

Gipadayag usab ni Liza nga nasayangan siya tungod kay ang iyang anak nagtungha man sa kolehiyo sa kursong Information Technology Associate.         

Ang inahan ni Laureo walay ideya kung kinsa ug unsa ang hinungdan sa pagpatay sa iyang anak.

Si SPO1 Victor Ruel Ayuman, sa Homicide Section mipadayag nga ila pang sutaon kun unsa gyud ang sinugdanan sa pagpamusil ug kun si kinsa ang mga kontra sa duha ka biktima.

Narekober sa crime scene ang tulo ka slug sa wala pa matinong klase sa armas. (BANAT NEWS)