Asawang mipatay sa iyang bana gibuhian
CEBU, Philippines - Hilak sa kalipay ang gibati sa usa ka asawa human prisoha kay mipatay sa iyang bana, apan gipabuhian sa iyang mga anak ug mga bayaw gikan sa prisohan sa miaging Biyernes.
Si Editha Suliano, taga sitio Cambiohan, Marigondon, dakbayan sa Lapulapu maoy mipatay sa iyang bana nga si Samuel Suliano, pormal nga gipagawas sa detention cell sa kapolisan sa dakbayan sa Lapulapu.
Nasuta sa Banat News gikan sa buhatan sa Homicide Section ang tulo ka babayeng bayaw ni Editha Suliano nga sila si Maria, Mesing ug Beth Suliano ug ang mga anak niini nga gipangulohan sa kamagwangang anak nga si Frederick Suliano sa ilang pagpadayag nga dili na sila interesado sa pagpasaka og kaso batok sa ilang inahan.
Matud pa ni Frederick, nga kini ang hukom sa ilang mga kabanay human sa ilang pagtimbang-timbang sa sitwasyon sa ilang inahan ug sa iyang mga manghud nga pulos pa gagmay ug walay makaatiman. Base sa police blotter “relative came to this office and manifested that they are not interested to pursue a case against the suspectâ€.
Ang maong mga pamahayag gisaksihan nila ni PO3 Lydo Pinos ug Melchora Patalinhug hinungdan nga kini gibuhian mga alas 5:00 sa milabay’ng Biyernes sa hapon.
Matud pa ni Editha sakit sa iyang buot ug nagbasol kini sa iyang pagpatay sa iyang bana apan dako niyang pasalamat sa iyang mga bayaw nga misabot ug nakapasaylo kaniya.
Kini aron makapadayon siya sa pag-atiman sa ilang siyam ka mga anak ilabi na nga mabdos kini sa ilang ikanapulo nga anak ni Samuel.
Kahinumdoman nga sa milabay’ng Hunyo 18, ning tuiga napatay ni Editha si Samuel gumikan sa iyang pangabubho. Iyang gibasehan ang cell phone sa iyang bana nga may mga mensahe gikan sa babaye gituohan niyang hinigugma sa iyang bana. (BANAT NEWS)
- Latest
