Kural sa CPA giguba gyud sa Cebu City Govt.

CEBU, Philippines - Hingpit na gyud nga giguba sa mga kawani sa Cebu City Hall ang kural nga gitukod sa Cebu Port Authority (CPA) palibot sa karaang building sa Compania Maritima nga walay permit sa Office of the Building Officials (OBO).

Wala gyud hunongi sa mga sakop sa Prevention Restoration Order and Beautification Enhancement (Probe) ang pagguba sa kural hangtud nga kini nakompleto sa paghuman bisan lapas na sa oras nga tingtrabaho.

Kadtong gisemento nga parte sa karsada nga kabahin sa Lapulapu Street ug P. Burgos Street gipadam-agan sa mga backhoe ug buldozers hinungdan nga nangapulpog ang semento.

Ang mga puthaw nga kural nga gisemento palibot sa property gitangtang usab ug gigamitan og acetylene, dayon ang mga puthaw gidala sa bodega sa Probe didto sa CitiCenter Commercial Complex.

Ang mga gwardya nga gisweldohan sa CPA nga mobantay sa mao nga property walay nahimo dihang mihugop ang mga kawani sa City Hall nga nangguba sa kural.

Si Chief Inspector Felix Quiachon nga maoy commander sa Cebu Port police miadto apan matud niya igo lang sila nga mi-document sa gihimo sa mga sakop sa Probe.

Matud ni Raquel Arce nga lider sa Probe nga igo lang sila nga mipatuman sa kamandoan ni Mayor Michael Rama nga wala na makaagwanta sa gihimo sa CPA nga mikontrolar sa maong dapit.

Ang luna gihimo kaniadto nga extention parking area sa City Hall alang sa mga sakyanan sa mga tawo nga mo-transact og busine

ss sa dakbayan apan wala na pasudli sa CPA pinaagi sa pagbutang og koral. (/EIM) (BANAT NEWS)