Sayon na tawgon ang polis

CEBU, Philippines - Pipila ka semana gikan karon ang publiko makahimo na pagtawag sa kapolisan pinaagi lang sa pagdayal og tulo ka numero gikan mismo sa ilang mga cell phone , unya wala pa g’yuy bayad.

Ang mga tagdumala sa lainlaing telecommunication companies sama sa Globe Telecom, Smart, Sun Cellular ug PLDT mitambong sa tigum kagahapon sa mga sakop sa Police Coordinating Advisory Council.

Ang secretary sa PCAC nga si Eli Espina mitug-an nga wala g’yuy mibalibad sa mga representante sa mao nga mga telecommunication companies nga mitambong sa tigum.

Si Jess Laureno nga maoy regional director sa National Telecommunications Company (NTC) sa Central Visayas mihulagway nga nindot ang mao nga proyekto.

Matud ni Laureno nga sayon ra kaayo ipatuman ang paghatag og higayon sa mga cell phone subscribers dinhi sa dakbayan sa Sugbo nga makatawag sa Cebu City Police Office pinaagi sa ilang cell phone.

Gusto sa mga sakop sa PCAC nga pinaagi sa pagdayal lang sa tulo ka numero sa selpon makatawag na ang katawhan ngadto sa kapolisan.

Si Laureno miingon nga sayon ra kaayo kini himoon sa mga telecommunication networks apan dili kini magamit sa mga nagpuyo sa lain nga syudad o kaha lungsod.

Gipasabot ni Laureno nga ang himoon mao nga kadto ra nga mga tawo nga anhi magdayal og tulo ka numero, sama sa 117, nga makakontak sa kapolisan.

Si Laureno miingon nga ang paghatag og higayon nga makatawag ang publiko nga libre ngadto sa kapolisan gamit ang ilang selpon makatabang kini nga masulbad pagdali kun adunay mga krimen. (BANAT NEWS)