Kinitaan sa ihawan sa Talisay misaka

CEBU, Philippines - Ang kinitaan sa ihawan sa dakbayan sa Talisay misaka sulod na sa duha ka tuig matud ni Talisay City Veterinarian Dr. Santiago Hortel.

Si Hortel mibutyag nga kaniadto ang kita sa ihawan sa siyudad P400 mil lang matag buwan, apan karon mokabat na sa P1.1 milyones matag buwan ang gross income sa ihawan.

Ang maong umento sa abot sa ihawan nahimong  permanente sulod na  sa milabay’ng duha ka tuig.

Matud ni Hortel nga matag adlaw wala’y labot sa weekend mokabat  sa 130 ka  baboy ang ipaihaw  sa maong ihawan ug sa weekend moabot kini ngadto sa 250 ang gidaghanon.

Ang mga tag-iya sa mga baboy nga ipaihaw mobayad  og P165 matag usa gawas niini, mobayad pa  sila  sa “ante-post mortem fee” o pag-eksamin sa baboy sa dili pa kini ihawon pagsuta kung dili ba  kini masakiton.

Matud ni Hortel nga dala sa ante-post mortem fee ang tag-iya sa baboy   makabayad og sobra sa P200 matag usa.

Gibutyag ni Hortel nga daku ang natabang sa meat task force tungod kay kanunay kining aktibo sa ilang operasyon  sa pagbantay  sa merkado publiko sa Lagtang lakip na  sa mga satellite market.

Ang mga manindahay og karne  sa merkado, anha na gyud  magpaihaw sa ilang  hayop  sa ihawan tungod kay imbarguhon man sa task force ang ilang mga karne kung dili kini gikan  sa ihawan sa siyudad.

Sa laing bahin, ang ihawan sa siyudad nagmintenar  sa double A standard.

Matud ni Hortel sa tibuok rehiyon ang lokal nga kagamhanan lang sa Talisay ang dunay double A standard  nga  nagpasabot  nga ang karneng gikang gipaihaw sa maong ihawan siguradong limpyo ug wala’y delikado sa panglawas sa konsumedor.

Si Hortel nagkanayon nga ang mga karne lang unta nga gikang gipaihaw sa double A standard nga ihawan maoy pweding mabaligya ngadto sa laing dakbayan ug kalungsoran   sa tibuok nasud kung ang Bureau of Quarantine (BOQ) higpit  pa nga moimplementar sa balaod.

Gibutyag ni Hortel nga ang konseho sa siyudad mipalabang og resolusyon niadtong Hulyo 31, 2012 nga naghangyo sa regional quarantine officer, Dr. Pablo Balite bahin sa estriktong implementasyon sa “no meat inspection certificate, no transport clearance policy”.

Ang kopya sa resolusyon nadawat  sa buhatan ni Balite niadtong Agosto 7, 2012.

Si Hortel nagkanayon  nga kung estriktong mopatuman ang BOQ sa balaod, makahatag kini og dugang pang abot sa ihawan sa Talisay tungod kay kadtong mga negosyante og karne sa ubang mga lugar anha na man mopaihaw sa ilang hayop sa ihawan sa siyudad. (BANAT NEWS)