Brgy. sa Mandaue gipalig-on

CEBU, Philippines - Gipalig-on   ang  kabarangayan  sa kagamhanan sa dakbayan sa Mandaue  aron  matubag dayon  ang  alarma sa mga katalagman nga naglakip sa pagbaha niining panahon sa ting-ulan. Kini ang nasayran sa Banat News kang Barangay Kapitan Nelson Rubio sa barangay  Umapad dihang nahinabi sa mga tigbalita sa press conference nga gihimo niadtong miaging adlaw.

Gitataw niya nga sa pagpalig-on nga gihimo sa Local Disaster  Risk Reduction and Management Council sa maong dakbayan   nga  gipasiugdahan  sa kagamhanan  ang pag-cluster o pagbahin sa kabarangayan sa mga kaakohan sa panahon sa katalagman. Dugang na kining  gihimo ni  Mayor Jonas Cortes ang maong lakang alang sa pagpangandam sa pagtubag sa katalagman   aron masiguro nga kalikayan  ang dakong kadaut sa kinabuhi sa mga molupyo sa kabarangayan.

Nunot sa pagpalig-on sa pagtubag sa  mga katalagman  gitahan sa mayor sa dakbayan sa matag cluster ang mga kahimanan sama  sa  rubber boat ug uban pa nga galamiton sa mga sakop sa rescue team.

Si Kapitan Rubio sa barangay Umapad sa maong dakbayan kinsa  mao usab ang cluster head sa mga barangay nga maoy mosuhid sa panahon nga kusog ang pagbunok sa ulan nga nagdala   og kuyaw   sama  sa baha. Gilangkoban sa gi-cluster nga mga barangay   ang ilang kaakohan sa Barangay Disaster and Risk Reduction and Management Council nga gipangulohan ni Kapitan Rubio isip cluster head, barangay  Labogon, barangay Paknaan, barangay  Opao ug barangay Umapad sa maong dakbayan. 

Si Architect   Florentino Nimor Jr. nga  sakop sa committee on drainage monitoring council sa dakbayan miingon nga nag-una karon sa ilang gihingusgan sa pagpatuman mao ang pagbahig sa madunot  ug dili madunot nga basura sanglit nag-una man kini nga nahimo  sa mga pagbaha nga maoy makabara sa pagdagayday sa tubig  ngadto sa dagkong mga sapa. (BANAT NEWS)