Nabuang sa gugma

CEBU, Philippines - Patay ang usa ka 18-anyos nga dalaga human kini giunay sa pagpusil sa iyang live-in partner kagahapon sa buntag sa Sitio Canapnapan, Barangay Campo 8, Toledo City.

Si Sheila Paraiso, nakaangkon og samad pinusilan sa dughan samtang ang kaipon niini nga si Jesus Eredias, 32, patay usab mipusil usab sa kaugalingon gamit ang sumpak. Ang duha patay diha-diha dayon.

Matud ni PO3 Alfredo Barquin, imbestigador, nga si Paraiso ug Eredias nadunggan nga naglalis human gusto na ni Paraiso nga buwagan ang kaipon kay matud pa napul-an na kini.

Sunod nalang nga nadunggan sa mga silingan ang duha ka lanog nga buto ug sa ilang pagsusi nagbuy-od na ang duha.

"Gusto na mubuwag ang babaye unya dili musugot ang laki kung magbuwag sila patyon kuno niya," matud pang Barquin sa pakighinabi sa Banat News sa telepono.

Si Barquin midugang nga walay uyab si Paraiso matud pa sa pamilya niini.

"Napul-an lang siguro kay ang laki paminaw ko seloso kaayo," dugang pa ni  Barquin.

Usa ka suicide note ang nakit-an nga nangayo og pasaylo si Eredias sa iyang pamilya kay matud pa nabuang siya tungod sa gugma.

Narekober usab sa kapulisan ang improvised gun kon pugakhang ug duha ka basiyo sa bala niini diha sa crime scene. (BANAT NEWS)