Mayor Soc maoy mimando nga di manawat og libudsuroy nga iro ang Talisay City Vet

CEBU, Philippines -  Human sa nahitabong insidente sa pagpanablig og asido ngadto sa mga iro sa usa ka residente diha sa sitio Bontores, barangay Mohon, dakbayan sa Talisay ang kapitan sa maong barangay nga si Dario Villaver naproblema kabahin sa mga libudsuroy nga iro diha sa ilang lugar.

Kahinumduman nga gibutyag ni Villaver nga gibalibaran na siya sa city dog pound dihang mitawag siya aron ipadakop ang mga irong libudsuroy diha sa ilang barangay.

Ang city veterinarian nga si Dr. Santiago Hortel sa pakighinabi niini sa Banat News mibutyag nga mihunong sila sa ilang operasyon sa pagpanakop og mga irong libudsuroy tungod sa kamanduan sa mayor.

Giingong tumong sa mayor ang kalimpiyo sa ihawan tungod kay nagmentenar kini sa double A accreditation sa National Meat Inspection Services (NMIS).

Niadtong Enero 8, 2013 si Mayor Socrates Fernandez mipadala og note kang Hortel nga nagkanayon “To: Dr. Hortel Slaughterhouse Head, We withhold the entry of apprehended dogs to our slaughter house for the sake of clean & sanitation. I prefer under Mananga space (former dog pound-area) to other places.

Laing notisya ang gipadala ni Fernandez alang kang Hortel niadtong Marso 22, 2013 nga nagkanayon “We suspend the entry of dogs at our pound. We will look for space as advice by Cong. E. Gullas”.

Matud ni Hortel nga gituman nila ang kamanduan sa mayor ug kung dunay motawag diha sa iyang buhatan nga mohangyong dunay ipadakop nga iro nga mamaak o mga libudsuroy iduso nila kini ngado sa buhatan sa mayor. Ug kung ang mayor motugot anha pa sila modakop sa iro.

Kaniadto ang city dog pound magpahigayon sa ilang operasyon batok sa mga libudsuroy nga mga iro katulo sa usa ka semana maong moabot og 50 ka iro sa usa ka buwan ang ilang mahipos.

Ubos sa ordinansa sa siyudad ang maong mga iro patyon kini human sa tulo ka adlaw kung walay mokuha niining tag-iya.

Ang mo-claim sa irong nadakpan sa dog pound magbayad kini og P75 isip redemption fee. Sa laing bahin, si Hortel nagkanayon nga sukad niadtong buwan sa Enero niining tuiga usa pa lang ka kaso sa rabies ang ilang natala ug kini gikan sa barangay Jaclupan.  (BANAT NEWS)