Duha ka masiao usher sikop

CEBU, Philippines - Nagtingkagol sa karsel ang duha ka lalaki human kini masikop sa gipahigayong saturation drive  sa sitio Lawis, barangay Pasil, dakbayan  sa Sugbo, pasado alas 9:00 sa miaging gabii.  Ang mga nasikop mao sila  si  Nelson Gabica, 49, molupyo sa Tabokanal, Basak ,San Nicolas ug si Bebot Libre Alquisola, 52,  nga molupyo usab  sa maong dapit.

Matud pa ni Deputy Chief for Administration, Sr. Insp. Keith Allen Andaya sa City Intelligence Branch, nga sa ilang naandan, mipahigayon sila og saturation sa pipila ka lugar nga kasagaran adunay mga nalambigit sa kriminalidad.

Miagi sila sa usa ka   balay nga nag-abli lang apan ilang gikatingala tungod kay   ilang  nakita  nga busy  kaayo og tally si Gabica sa mga gipanghatod nga tally sheet kaniya hinungdan nga ila kini nga gisusi. Dihang   nasuta sa kapolisan  nga aktuwal nga nag-tally si Gabica, samtang si Alquisola mao usab ang giingong usher ni Gabica.

Dugang pa ni Andaya nga si Gabica gikatahong magbalhin-balhin og lugar ug gani, ang lugar kun asa siya masakpi sa miaging gabii iya lamang nga giabangan.

Aduna usab siyay mga tawo nga maoy molihok sa maong lugar. Samtang si Gabica, wala usab  ilimod ang maong negosyo, apan matod pa niini nga ang iyang kalisud ug panginahanglan sa iyang pamilya ilabi na sa iyang mga anak maoy nakatukmod kaniya sa pagsulod sa maong trabaho.

Dugang pa ni Gabica, nga bag-ohay lang usab siya nga mibalik sa maong trabaho apan gitug-an niini nga kaniadto pa siya misulod  ning  maong  bisyo.

Nagdumili usab si Gabica sa pagbutyag   sa  mga tawo nga maoy mokuha sa kwarta nga gi-remit sa iyang mga ushers.

Samtang si Alquisola sa iyang bahin mipadayag usab nga bag-ohay lang  siya nga misulod sa maong bisyo ug kini tungod kay wala siyay trabaho hinungdan nga namorsento lang siya niini.  (BANAT NEWS)