Patay kay giluba sa mga kauban Bong Soriano ug

CEBU, Philippines - Patay on the spot ang usa ka lalaki human kini dunggaba  sa iyang kauban sa trabaho didto sa luyo sa  Matimco, Brgy. Subangdako dakbayan sa Mandaue, kagahapon sa kaadlawon.

Ang biktima mao si Leonilo Nersa, hingkod,  lumad sa dakbayan sa Tacloban ug kasamtangang nagpuyo sa Mandaue ug usa ka construction worker.

Samtang gitumbok nga responsable sa maong krimen mao sila si Angelo Empleo, 37 ug Eden Contapay, 33, pulos minyo ug mga residente sa maong dapit ug mga construction worker  usab.

Sa pasiunang imbestigasyon sa kapolisan sa Station 2 sa Mandaue City Police Office (MCPO) nasayran nga   sa mga alas 2:30 kagahapon sa kaadlawon samtang nag-inom si Nersa ug ang duha ka mga suspek uban sa ilang mga kaubang trabahante sa usa ka construction sa maong dapit, pipila ka gutlo mitumaw ang panaglalis ni Nersa ug Empleo gumikan sa dili maayong komedya.

Gumikan  kay mga  lasbag  na, misantop sa  hunahuna  sa  suspetsado  ang pagpanunggab  sa biktima.

Si Nersa gigunitan ni Contapay samtang si Empleo maoy midunggab sa biktima sa makadaghan sa dughan hinungdan sa hinanaling kamatayon ni Nersa.

Human sa insedente dali nga misibat sa maong dapit ang mga suspek, apan gumikan sa abag sa mga kauban niini, si Empleo ug Contapay nasikop sa kapolisan.

Kasamtangan gibalhug sa detention cell sa Police Station 2 sa MCPO ang mga suspek ug pasakaan kini og kasong murder sa kapolisan. (/WC) (BANAT NEWS)