Armadong port police ug sikyu sa CPA mibabag sa PROBE pagtangtang sa tarpaulin sa CPA

CEBU, Philippines - Mga armado nga portpPolice ug gwardya sa Cebu Port Authority mibabag  sa mga sakop sa City Hall kagahapon pagtangtang sa daku nga tarpaulin nga gibutang duol sa karaang building sa Compania Maritima nga nagpahibalo nga ang maong dapit gipanag-iya sa CPA.

Ang mga sakop sa City Hall Clearing Team nga gipangulohan ni Raquel Arce mopatuman unta sa kamandoan ni Mayor Michael Rama nga tangtangon ang maong higanti nga tarpaulin nga adunay marka nga “Cebu Port Authority Property.”Aron paglikay nga moulbo ang dugoong panghitabo tali sa mga armadong port police ug mga gwardya sa CPA batok sa mga City Hall personnel, nakahukom si Arce nga dili lang usa ipatuman ang kamandoan apan gikasuko kini sa mayor.

Gipatawag sa mayor sila si City Administrator Jose Marie Poblete ug si Arce ug gimandoan atubangan sa media nga ipursigir gyud ang pagtangtang sa tarpaulin ug sa koral nga gitukod sa CPA nga walay permit.

Gimandoan ni Rama ang duha ka opisyal sa City Hall nga gamiton ang kapolisan kun ang mga port police mag-apil-apil usab sa pagbabag sa pagahimoon sa City Hall.

“Naa sila’y port police? Naa ‘sab ta’y polis, tan-awon nato kun kinsa ang adunay authority, ang polis ba o sila,” matud ni Rama.

Gipasabot ni Rama nga wala siya malipay nga nakakita sa dakung tarpaulin nga gipahiluna sa CPA diha sa dapit nga giangkon nila nga ila bisan og wala sila’y mga papeles.(Rene U. Borromeo/EIM) (BANAT NEWS)