Naigo sa saag nga bala angol

CEBU, Philippines - Naangol ang usa ka tawo nga naigo sa saag  nga bala sa armas de fuego  didto sa Poso Center sa barangay Mactan, dakbayan sa Lapulapu  sa  miaging adlaw.

 Si PO1 Jomar Florentino sa homicide section sa kapolisan sa maong dakbayan miila sa biktima nga mao si Victor Baraclan Jr., 22 , ulitawo nga nagpuyo sa maong dapit.

Matud pa ni PO1 Florentino nga kauban sa biktima ang iyang mga higala nga nag-inom sa maong dapit dihang kalit  nilang nabati ang lanog nga boto sa armas   sa ilang  palibot.

 Dugang pa niya nga pipila  ka gutlo ang nakalabay human sa lanog nga boto    namatikdan na  sa biktima ang pagpamanhod sa iyang bitiis.

Dihang  gisusi sa  iyang mga higala ,   ilang nakita ang nag-agas nga dugo gikan sa samad sa  bitiis  niini nga gituohan nilang naigo sa saag nga bala.

 Dali  nga gidala   ang biktima ngadto sa Mactan Doctors Hospital ug ang mga doktor nga nag-atiman maoy   mikompirmar nga  naigo  gayud  sa bala sa armas nga wala pa matino ang kalibre.

Padayon  pa  nga gisusi  sa   kapolisan ang  lugar  diin  mag-inom  ang  biktima ug  ang  mga  higala  niini  nga  nakadungog  sa boto  sa armas  de fuego. (BANAT NEWS)