6 anyos nadasmagan sa motor kritikal
CEBU, Philippines - Kritikal ang kahimtang sa usa ka 6 anyos nga batang babaye human kini dasmagi sa naghaguros nga motorsiklo atubangan sa Tuyan Central Elementary School sa barangay Tuyan syudad sa Naga niadtong Martes sa alas 7:15 ang takna sa buntag.
Ang biktima giila nga si Beverly Repunte Rubio, 6, grade 1 pupil sa Tuyan Elementary School, lumad nga taga Tinaan, syudad sa Naga apan bag-ohay lamang nakapuyo sa barangay Tuyan.
Samtang ang suspetsado nga nagmaneho sa Honda XRM 120k nga may plate number 971 JB mao si Joel Linabia Lascunia, 37, minyo, lumad nga taga Guindarohan, lungsod sa Minglanilla, ug usa ka construction worker sa Adlawan Construction.
Sigon pa ni Pat Gahera, usa sa mga saksi nga barangay tanod sa Tuyan nga ilang gipahunong ang mga sakyanan tungod kay may mga ginikanan ug kabataan nga milabang paingon na sa eskwelahan sa Tuyan.
Apan iyang nakit-an nga kusog nga nagpadagan ang suspetsado nga si Lascunia sa iyang motor nga may duha ka mga sakay agi sa daplin ug pidpid na kaayo nga dapit sa karsada.
Matud pa ni Gahera nga ang inahan sa bata nagkupot sa iyang anak gikan sa pikas nga habig hangtud na sa tungatunga sa dalan .
Apan iya kining gibuhian kay hapit na moabut sa pikas daplin sa karsada , dihang kalit nga gidasmagan ang bata sa motorsiklo nga gimaneho ni Lascunia.
Ang biktima nalagput og tulo ka metros ug maayong pagkabunal sa ulo niini sa sementadong dalan.
Dali kining gihatod ngadto sa South General Hospital ug anaa pa kini sa kritikal nga kahimtang tungod sa pagkapantok sa ulo niini sa semento.
Samtang ang suspetsado nga nakaangkon usab og mga pangus sa nagkadaiyang bahin sa lawas gidala dayon ngadto sa kapolisan ug anaa na kini karon gibilanggo sa City of Naga Police Station. (BANAT NEWS)
- Latest
