Koreano gipasanginlang misunog sa iyang lawak

CEBU, Philippines - Gitanggong sa bilanggoan ang usa ka Korean national nga gituohang maoy nagsunog sa lawak sa pension house nga iyang gipuy-an   sa sitio Datag sa barangay Maribago, dakbayan sa Lapulapu  sa miaging kaadlawon.

Si FO3 Teddy Valla sa Bureau of Fire and Protection (BFP) sa dakbayan sa Lapulapu miila sa suspetsado nga si Park Su Chu, hingkod, nga temporaryong nagpuyo sa Happy Heaven Pension House sa sitio Datag sa barangay Maribago.

Matud pa ni FO3 Valla nga nahingangha na lamang ang mga kawani sa nahisgotang pension house dihang kalit lang miulbo ang kayo sa Room 320 sa nahisgotang pension house.

Ang  maong  lawak maoy gipuy-an  ni Park sumala  sa mga  kawani  niini.

Sa  pagsusi  sa mga kawani ilang  nasuta nga nagsugod na sa pag-ulbo ang kayo nga maoy hinungdan nga  nagtinabangay sila  og pawong niini.

Nasuta nga  mao  pay  pagsugod  sa pagdilaab sa kayo nga  gigamitan  lang  og  fire extinguisher  ang  pagpawong  sa  maong  sunog.

Dugang pa ni FO3 Valla nga nadawat nila ang maong alarma  apan napawong na ang kalayo sa ilang paghidangat sa maong dapit.

Sa imbestigasyon nga  gihimo  ilang nasuta nga ang nagpuyo nga Korean national sa sulod sa kuwarto sa nahisgotang pension  house kinsa hubog atol sa maong hitabo   

Si Park gituohang nataligam-an ang gidagkotan nga sigarilyo niini nga nakaingon sa kalit nga pag-ulbo sa kalayo.

Hinuon si FO3 Valla miingon nga ilang gidakop ang maong Korean national ug temporaryong gibalhog sa bilanggoan  ug nagpaabot pa sila sa hukom sa tag-iya sa maong pension house alang sa pagpasaka niini og kaso. (BANAT NEWS)