Kapolisan kaabag sa paghinlo sa kadagatan sa Lapulapu

CEBU, Philippines - Ang kapolisan  ug tanang mga opisyal sa barangay nga anaa daplin sa baybayon sa dakbayan sa Lapulapu ug sa isla sa Olango malampusong mipahigayon sa ilang tinuig nga Coastal Clean-up kagahapon. Ilang gitinguha   ang paglimpiyo sa kadagatan ug kabaybayunan  sa mga sagbot ug hugaw nga mugna sa pagpabaya sa katawhan.

Sinakong hugaw gikan sa kadagatan ang nakuha sa mga partisipante ug ang pipila ka pribadong grupo sa mga divers sa dakbayan sa Lapulapu ang miduyog sa maong kalihukan. Ang mga sakop sa kapolisan nga miyembro sa Sucubasurero ug mga dive shops owner maoy mihimo sa paglimpiyo sa mga sagbot ilawom sa kadagatan diin sinako usab ang ilang nakuha. Atol sa pagsusi sa Banat News sa maong kalihukan ang mga barangay nga anaa daplin sa kabaybayonan mihimo sa pagpanglimpiyo uban sa ilang mga opisyales sa barangay ug mga residente niini.

Sayo niini  atol sa Coral Triangle Day didto sa Brgy. Mactan niadtong  Hunyo  6, 2013 uban ni DENR-7 RED Isabelo R. Montejo, si Lapulapu City Mayor Paz Radaza mipadayag sa iyang kalipay sa gihimong pagpakabana sa usa ka langyaw nga mitaho ngadto kanila sa kadaut nga nahimo sa Cebu Yellow Submarine sa mga coral reef o gasang  sa ilawom sa dagat.

Gumikan niini nanghinaut si Mayor Radaza nga susama usab ang ipakitang pagpakabana sa mga residente sa dakbayan sa Lapulapu sa pagmonitor sa ilang tagsa-tagsa ka mga area sa mga illegal nga panagat ug paghugawhugaw sa kadagatan. “I am proud to see you all here doing your part to protect our precious underwater world. Let us never turn our back on mother earth who has given us a rich marine life”,  matud pa ni Mayor Radaza. (BANAT NEWS)