Wild disease gipasidaan sa DOH

CEBU, Philippines - Mipasidaan ang Department of Health (DOH) sa mga ginikanan nga bantayan ang ilang mga anak batok sa ‘WILD’ diseases karong panahon sa tingklase ug ting-ulan.     Matud pa ni DOH Assistant Secretary Dr. Eric Tayag, uso na karong panahon sa ting-ulan ang gitawag nga ‘WILD’ diseases o  water-borne diseases, influenza, leptospirosis ug dengue diseases.

Ang water-borne diseases mao ang mga sakit nga gikan sa kontaminadong tubig tungod na usab sa mga pagbaha.

Daling mataptan niini ang mga estudyante nga mosulod sa eskuwelahan.

Matud pa ni Tayag, kun makainom og kontaminadong tubig, mahimong magka-diarrhea o cholera ang usa ka bata nga maoy  angay bantayan sa mga ginikanan ang dehydration.

Samtang ang influenza o trangkaso usab adunay sintomas nga ubo, sip-on ug hilanat.

Apan kun maglisud na o paspas na kaayo ang pagginhawa sa bata, angay na kining dad-on dayon sa tambalanan tungod kay musangpot kini sa pulmonya.

Ug tungod kay gipaabot ang pagbaha sa pagsulod sa ting-ulan, gipaamping sa DOH ang publiko batok sa Leptospirosis o ang bakteryang makuha sa baha nga kontaminado sa ihi sa ilaga.

Alang usab sa dengue, maayo nga siguradohong walay lamok nga namuyo sa palibot.

Ang tambag sa DOH, magsul-ob og long sleeve ug pantalon aron dili mapaakan og lamok.     Mao usab kini ang hugot nga tambag ni DOH 7 Regional Director Asuncion Anden ngadto sa publiko sanglit nagsugod naman ang pagbunok sa ulan sa tibook rehiyon.

Matud pa ni Anden nga kinahanglang dili magmagahi ang publiko sa mga pasidaan sa ilang buhatan.

Midugang si  Anden nga napanglantawan usab nila nga wala’y makasinati sa maong sakit aron  walay makalas  nga kinabuhi.

Nanghinaut si Anden nga unta kahatagan og igong atensyon ug usab paminawon ang ilang mga sugyot alang sa kaayohan sa tanan. (BANAT NEWS)