1,000 ka estudyante nakapahimus sa outreach program ni Samsam

CEBU, Philippines - Mikabat ngadto sa 1,000 ka mga estudyante gikan sa kinder hangtud sa grade six sa Lawaan III Elementary School ang nakabenipisyo sa feeding ug outreach program nga gipahigayon ni Congressman-elect Samsam Gullas kagahapon sa    buntag.

Ang maong programa ubos sa pag-abag ni Shanna Lopez, Executive Vice President sa Nexuz Real Estate Corporation ug sa uyab niining si Rainer John Sanchez kinsa tag-iya sa Shamrock ug classmate ni Samsam sa kolehiyo.

Ang mga opisyal sa barangay gipangulohan ni Kapitan Deliah Ybañez kinsa misuporta usab sa maong programa.

Kagahapon sa buntag ang mga estudyante nagtapok  sa basketball court sa barangay diin ang pagpanghatag  gipahigayon.

Si Samsam sa pakighinabi niini sa mga tigbalita  mibutyag nga si Lopez ug Sanchez miduol  kaniya ug nangayo og tabang sa ilang planong outreach program ug wala niya kini balibari.

Matud ni Samsam nga nanghinaot siyang mapadayon ang outreach program tungod kay daku kaayo kining tabang ngadto sa mga kabus.

Si Samsam midugang nga kabahin sa mga panginabuhian ug kooperatiba ang usa sa iyang giplanohang tukoron aron ang mga kabus matabangan kini nga dili maglisud sa panginabuhian.

Sa laing bahin, si Ybañez mapasalamaton  nga ang ilang barangay maoy napilian nga makabenipisyo sa programa sa grupo ni Samsam. Nunot niini, si Ma. Angelica Lauronilla, prinsipal sa nahisgutang tunghaan mibutyag nga ang Lawaan III Elementary School adunay 1,420 ka mga estudyante gikan sa kinder ngadto sa grade six.      

Matud ni Lauronilla nga gipili nila kadtong mga labing kabus nga estudyante nga makabenipisyo sa outreach program.

Ang pagpanghatag og mga school supplies daku kaayong tabang sa mga ginikanan sa kabataan nga  estudyante.

Sama sa ubang mga tunghaan gibutyag ni Lauronilla nga nagkuwang usab sila og mga classroom ug nagpahigayon sila og duha ka shifting sa ilang klase aron masulbad ang maong problema.

Sa buntag magsugod kini og klase sa alas 6:00 sa  hangtud sa alas 12:00 sa udto ug ang klase sa hapon magsugod  gikan sa alas 12:00 sa udto hangtud sa alas 6:00 sa hapon. Ang maong tunghaan adunay  12 ka  classroom ug ang ilang kinder naa magklase sa ilang barangay hall. (BANAT NEWS)