Daghan ang namatay sa unang 3 ka buwan ning tuiga

CEBU, Philippines - Mas daghan ang mga tawo nga namatay dinhi sa dakbayan sa Sugbo sa unang tulo ka buwan karong tuiga kun itandi sa susamang mga buwan kaniadtong miaging tuig.  Samtang ang statistics sa Office of the Civil Registrar nagpakita nga mikunhod usab ang gidaghanon sa mga bata nga natawo sa mao nga mga buwan.

Matud ni Civil Registrar Evangeline Abatayo nga ang nangamatay gikan sa Enero ngadto sa Marso karong tuiga miabot og 4,420 nga mas taas kun itandi sa 4,307 sa sama nga termino kaniadtong 2012.

Ang mga bata nga nahimugso sa unang tulo ka buwan karong tuiga miabot og 14,837 apan mas ubos kini kun itandi sa 15,333 kaniadtong miaging tuig.

Si  Abatayo wala makapasabot kun nganong midaghan ang mga tawo nga namatay karong tuiga ug   ngano nga minus ra ang natawo nga mga bata sa ning tuiga.

Sa laing bahin, nahibaw-an nga midaghan ang mga tawo nga mihimo’g Petition for Change of first name and Correction of Clerical Error kay gipul-an na sa ilang mga ngalan ug gusto na nga ilisan og bag-o.

Matud ni Abatayo nga ang pag-ilis sa ngalan mahimo na diha sa iyang opisina apan dili niya kini himoon kun walay igo nga rason nga ang maong mga tawo gusto nga moilis sa ilang ngalan. Si Abatayo miawhag niadtong gusto nga moilis sa ilang ngalan sa pag-adto lang sa iyang opisina. (Rene U. Borromeo/WC) (BANAT NEWS)