Bicycle cops tukoron sa Talisay

CEBU, Philippines - Ang officer-in-charge sa Talisay City Police Station nagplano sa pagtukod og bicycle cops sa siyudad.

Si Superintendent Elmer Lim sa pakighinabi niini sa mga tigbalita kagahapon mibutyag nga magtukod siya og grupo sa bicycle cops sa siyudad.

Gipasabot ni Lim nga ang bisekleta gamay lang kini og maintenance dili usab sila makagasto og gasolina gawas niini makaehersisyo usab ang mga polis ug makasulod-sulod pa sila og mga suoton nga lugar nga dili mahibaw-an kung dunay operasyon tungod kay walay saba ang bisekleta.

Gibutyag ni Lim nga niadtong Huwebes sa hapon gihatagan sila og lima ka surplus nga mga bisekleta sa English Secondary Language School nga nahimutang diha sa barangay Cansojong. Ang maong tunghaan usa kini ka Korean school.

Ang nahisgutang mga bisekleta gikan kini sa Korea.

Ang OIC nanghinaot nga duna pa untay laing modonar kanila og mga bisekleta aron madugangan ang ilang mga bisekleta nga magamit sa mga bicycle cops.

Ang maong lima ka mga bisekleta sa pagkakaron ipagamit kini sa mga beat patrol aron dili na sila maglakaw.

Matud usab ni Lim nga sa pagkakaron ang mga polis nga pagamiton sa maong mga bisekleta PNP athletic attire ang ilang isul-ob inig-patrolya nila. Apan matud ni Lim kung duna silay budget magpahimo sila og mga uniporme sa bicycle cops.

Dugang sa OIC nga sobra sa 10 ka polis ang pilion niya nga idestino isip mga bicycle cops. (BANAT NEWS)