Police visibility, patrols vs tulisan

CEBU, Philippines - Pabor si acting Governor Agnes Magpale sa police visibility ug preventive patrols sa kapolisan kun itandi sa pagkuha og mga gwardiya sa mga pribadong establisemento batok sa mga tulisan.

Kini ang pamahayag ni Magpale agi’g reaksiyon sa nagsunod nga pagpanulis og mga prendahanan nga naabot na sa ubang bahin sa lalawigan sa Sugbo.

Si Magpale mipadayag sa iyang kabalaka human usa ka prendahanan sa dakbayan sa Naga ang gitulis usa ka adlaw human usa ka susamang establisemento sa dakbayan sa Sugbo ang gitulis usab.

Giawhag ni Magpale si Cebu Provincial Police Office Director Sr. Supt. Patrocinio Comendador nga hingusgan ang police visibility ilabi na sa mga lugar nga dunay mga patigayon.

“We should not be depending on security guards, we should be able to provide,” matud pang Magpale.

Samtang maayo alang kaniya nga adunay security guard ang usa ka patigayun apan dili maayong isalig na lang ngadto kanila ang tanan.

Ang MLhuillier Kwarta Padala sa Barangay Inayagan, dakbayan sa Naga nakuhaan og P3,000 nga kwarta human tulisa sa duha ka wala mailhing tulisan, way gwardiya ug way CCTV camera ang maong establisemento.

Niadtong Martes, ang Palawan Pawnshop sa barangay Mabolo, dakbayan sa Sugbo ang biktima usab sa pagpanulis, wa usab kini gwardiya ug security camera.

Si Superintendent Elmer Lim, officer-in-charge sa Talisay City Police Station nga nahinabi sa Banat News miingon nga  duna nay patrol car nga kanunay’ng magpatrolya sa kadalanan diin nahimutang ang mga balay patigayon sa       Talisay.

Matud ni Lim nga ang mga business establishment gipangbisita nila kini ug gipahimangnoan ang mga tagdumala nga magbutang og Close Circuit Television (CCTV) cam ug gwardiya. (/EIM) (BANAT NEWS)