Abang sa stall sa Larsian mahal ra

CEBU, Philippines - Human imando sa Provincial Capitol ang pagpasira sa ubang stall sa Larsian Food Park sa miaging semana, mihangyo ang mga mangangabang og  stall ngadto sa Kapitolyo nga  pakubsan  ang  ilang renta. Apan miingon si Acting Governor Agnes Magpale na dili ingon niana kasayon ang pag-aprobar sa hangyo sa mga mangangabang tungod  kay ang presyo sa renta gideterminar pinaagi  sa bidding.

Human sa ilang Economic Enterprise Council (EEC) meeting kagahapon, gibutyag ni Magpale nga mag-bid sila og usab aron masayran  kun  pila ang  angay  ipaabang  sa matag  stall.

Ang  Larsian  gisudlan  sa 49 ka  mga  barbecue  stall  ug  siyam ka fruit stand.

Matud ni Provincial General Services Office head Eva Encabo, nga tag  P2,750 ang renta sa usa ka  square meter didto sa Larsian.

Ang usa ka stall, adunay upat ka square meter, sumala  ni Encabo.  Apan  base  sa reklamo sa uban mga stall tenant,  nga  pareho sila og bayrunon kada buwan samtang  dili  tanang stall tag-upat ka square meter  ang  gidak-on.

Si Magpale nangutana usab kun nganong wala moreklamo ang mga stall tenant. Apan gipasalig   ni Magpale nga iyang ipa-sukod og  usab  ang matag  stall ug  sublion    paghimo  ang Memorandum of Agreement (MOA) sa Kapitolyo ug sa mga tenant aron matan-aw unsa pa ang angay usbon gawas  sa renta.

Matud sa mga mangangabang  nga alkansi sila sa ilang renta kada buwan kay dili kaayo maayo ang kita  sa food park karon.  Kini  tungod  kay madunot usab kuno ang ilang mga baligya maoy  hinungdan  nga  modugang sa ilang alkansi.

Gibutyag usab nila nga wala silay  parking space para sa ilang mga customer.

Miingon si Magpale nga iyang  ipa-review sa Provincial Attorney ang ilang MOA.  “Dili man ta negosyante. While we are making money out of that, let’s balance business and public service.”

Sa miaging semana, gi-padlock sa Provincial Capitol ang 30 ka stall  tungod  kay wala  kini makabayad  sa ilang  abangan sulod  na  sa pipila  ka  buwan. Human sirad-i, miadto dayun ang ubang stall tenant sa Kapitolyo aron mobayad ug giablihan ra usab  kini dayon sa Kapitolyo. (BANAT NEWS)