Natug aping naigo sa saag nga bala

CEBU, Philippines - Naigo sa saag nga bala ang usa ka tawo nga natulog sa ilang  balay sa sitio Abuno, brgy. Pajac, dakbayan sa Lapulapu kagahapon sa kaadlawon.

Ang biktima mao si Gerald Lear, 37, minyo, nga nagpuyo sa maong dapit.

Sa pasiunang imbestigasyon ni PO1 Jade Quirubin  sa Lapulapu City  Police  Station  nasayran nga mga alas 2:50 kagahapon sa kaadlawon samtang natulog kini sa ilang  balay uban sa iyang asawa nakamata kini kay  adunay mihagtik sa iyang aping.

Nakugang si Lear nga nagkadugo na siya, hinungdan nga iyang gipukaw ang  iyang asawa ug nagpahatod kini sa tambalanan.

Ang mga doktor sa Mactan Doctors Hospital mipadayag nga samad  sa usa ka bala sa armas nga mibuto, nga  mitugpa  sa aping  sa biktima.

Gumikan niini gibalhin sa tambalanan sa Vicente Sotto  Memorial Medical  Center (VSMMC) si Lear ug ubos kini sa obserbasyon.

Samtang ang kapolisan misusi sa matang sa armas nga  gipabuto ug sa responsabli  niini  kansang bala  nakaigo  og  tawo. (BANAT NEWS)