Private security escort ni Gwen gipaslak sa prisohan kay ‘nanapog’ og polis

CEBU, Philippines - Nagtingkagol karon ang  nagpailang private escort ni suspended Governor Gwendolyn Garcia human gisikop sa mga sakop sa Provincial Intelligence Branch (PIB) tungod sa paghapak niini sa agtang sa usa ka pulis kagahapon sa buntag  diha sa Barangay Capitol Site dakbayan sa Sugbo.

Si PO3 Roderick Balili mipasangil kang Noel Monterola Labiaga, taga-Hermag Village, sa Barangay Pagsabungan dakbayan sa Mandaue nga mihapak sa iyang agtang. Si Balili gikan pang naghatod kang Sr. Insp. Leo Logroño, deputy chief sa PIB, ngadto sa Police Regional Office (PRO)-7 gikan sa Sudlon, Lahug aron sa pagtambong sa Metro Cebu Intelligence Conference. Samtang si Labiaga sakay sa usa ka Racal nga motorsiklo nga adunay ‘for registration’.  Siya sakop sa GGC Security Agency.

Matud ni Balili nga nagsunod siya sa de-pasaheroan nga jeep dihang misenyas ang drayber sa pagpauna kaniya hinungdan nga milubag gilayon siya paingon sa tuo dihang tan-aw niya walay sakyanan nga nagpaingon.

Apan si Labiaga matud pa nga kalit midikit kang Balili nga mura og misenyas kaniya nga pahunongon. Dihang mihunong si Balili aron sa pagsuta kun unsay tuyo ni Labiaga kalit siyang gidapog niini sa agtang.

Tungod niini, mipaila sa iyang kaugalingon si Balili nga siya usa ka pulis, diha na lang nakaamgo si Labiaga nga di diay sibilyan ang tawo nga iyang gidapog.

Matud pa nga misuway pa unta sa pagsukol si Labiaga apan wala na kini makapiog pa ug daling naposasan. Si Labiaga wala motingog sa mga tigbalita dihang gisuwayan pagkuha ang iyang habig. (BANAT NEWS)