Konsehal gipusil patay

CEBU, Philippines - Maayong pagkabuslot sa ulo sa last termer nga incumbent councilor sa lungsod sa Argao human kini gidul-itan pagpusil pasado alas  4 kagahapon sa hapon diha sa merkado sa barangay Poblacion sa maong lungsod.

Ang biktima nga si Councilor Joaquin Banosong, kanhi polis ug hepe sa kapolisan sa lungsod sa Alcoy ug karun naa na sa katapusang termino niya pagka-konsehal sa maong lungsod.

Sa pakighinabi sa Banat News ni PO2 Renato Nacaytuna, sa Argao Police  miingon nga gidala pa sa Isidro Kintanar Hospital apan gideklarar kini nga dead on arrival.

Sa pakighinabi sa Banat News sa mayor sa maong lungsod nga kapartido usab sa biktima nga si Mayor Edsel Galeos mipadayag kini nga ang biktima gikan pa nga nag-session ug mihapit kini sa merkado aron mamalit og isda sa dili pa kini mouli sa ilang panimalay.

Apan giingong dihang mosakay na kini sa iyang sakyanan usa ka wala mailhing tawo ang miduol ug midul-it pagpusil sa iyang ulo.

Matud pa ni Galeos nga gihulagway ang mamumuno nga nag-bonnet ug nagmotorsiklo diin ang backrider maoy mitira sa biktima.

Dili usab makatuo si Galeos nga adunay kalambigitan sa iyang kanhi pagka-polis ang hinungdan sa pagpamusil tungod kay hagbay ra unta kini nga nahitabo.

Gisalikway usab ni Galeos nga adunay politika ang motibo tungod kay last term naman sa biktima ug wala man usab kini milansar pa.

“Buotan kaayo na siya uy, kusog kaayong motabang og tawo,” padayag pa ni Galeos dihang nahinabi sa Banat News. Ang kapolisan  padayon pa sa imbestigasyon sa maong hitabo. Atol ning pagsuwat sa balita nagpahigayon og road blocks ang kapolisan sa kadalanan.  (BANAT NEWS)