Tinguwan gipangandaman sa taga Talisay
CEBU, Philippines - Ang kagamhanan sa dakbayan sa Talisay nangandam na sa pag-abot sa ting-uwan ug sa posibleng mahitabong katalagman nga gama sa kinaiyahan.
Si Talisay City Administrator Richel Bacaltos, nagkanayon kini nga usa sa ilang buhaton nga pagpangandam mao ang paglimpiyo sa mga kanal sa siyudad aron dili kini mabarado ug moawas nga hinungdan sa baha panahon sa ting-uwan.
Gawas niini ang mga residente diha daplin kabaybayonan ug kasapaan giawhag sa siyudad nga magmabinantayon aron malikay sila sa disgrasya.
Ang mga opisyal sa mga bukirang barangay sa siyudad ilabi na sa mga landslide prone area giawhag usab nga pahimangnoan ang mga residente diha sa ilang lugar nga magmabinantayon usab. Si Bacaltos nagkanayon nga kung ugaling dunay mahitabong katalagman nga gama sa kinaiyahan ang siyudad andam kini sa emerhensiya.
Ang siyudad duna kini mga ekipo nga magamit panahon sa emerhensiya ug dunay mga well-trained nga mga personnel nga moresponde. Si Bacaltos midugang nga ang siyudad duna usab kini sa calamity fund nga magamit nga hinabang sa mga mabiktima sa katalagman. (BANAT NEWS)
- Latest
