Hukom Gisumbag
CEBU, Philippines - Nakaangkon og bun-og ang usa ka huwes human kini gisumbag sa usa ka lalaking iyang sugo-sugoon pasado alas-12 kagahapon sa udto human magsimba ang biktima sa Sacred Heart Parish diha sa dalan D. Jakosalem sa barangay Zapatera sa siyudad sa Sugbu.
Si Bogo Regional Trial Court Branch 61 Judge Mario Trinidad, nakaangkon og bun-og human giingong gisumbag ni Charlie Alburo, 40, nga taga barangay Basak-Pardo apan magkanunayan diha sa balay sa biktima. Matud pa sa hepe sa kapolisan sa Parian Police Station nga si Chief Insp. Aileen Recla nga base sa alegasyon ni Trinidad nga bag-ohay pa sila nga migawas sa simbahan dihang giingong kalit lang siya nga giduol ni Alburo ug sa walay igong hinungdan gisumbag siya sa nawong.
Tungod niini, mikaratel og dagan si Trinidad ug gigukod sa suspek apan wala maabti ug nakauli gyud sa ilang balay ang biktima. Ang gibuhat sa suspek ngadto sa huwes giingong nakit-an ni barangay kapitan Jinggoy Reformina maong gigukod niya si Alburo hangtud nga napugngan ug pagkahuman gidala sa Pari-an Police Station.
Nasuta nga kagahapon sayo sa buntag hubog nga miabot ang suspek sa balay ni Trinidad ug mihangyong iyang putlon ang punoan sa Acacia diha sa luyo sa balay sa huwes kay aron makakawarta siya gikan niini. “Giingnan siyang judge nga ayaw lang kay dili na’ ato unya nakahatag sad na og shade diri. Mao ra to’y gikaingnan iyang giatangan si judge ug gisukmag niya. Hubog sad,†sumala pang Recla.
Kasong frustrated murder ang gikatakdang isang-at ni Trinidad batok sa suspek tungod kay giingong giatangan niini ang huwes diha palang sa simbahan.
“I don’t know if mo-prosper ba ang attempted murder case, but may intent man sad gud kay iya mang giatangan si judge unya mura sad daw naa siya’y gibunot sa hawak pagpadung niya sukmag kang judge,†sumala pang Recla.
Apan ang kapitan sa barangay nga maoy nakasikop sa suspek miingon nga wala siyay nakit-ang armas o bisan unsang hinagiban gikan sa suspek. (BANAT NEWS)
- Latest
