Ordinansa sa curfew ug internet ipatuman sa Mandaue

CEBU, Philippines - Higpit nga ipatuman sa kagamhanan sa dakbayan sa Mandaue ang curfew ordinance ug  ang ordinansa  sa  internet coffee nga nagdili sa mga tinun-an sa pagsulod sa mga adlaw nga adunay klase.

Si Rosa Mea  Palomo, 26, dalaga ug computer attendant sa usa ka internet coffee sa barangay Centro nga nahinabi sa Banat News miingon nga sa panahon sa bakasyon ang mga tinun-an sa high school ug elementary maoy nag-una nilang kustomer.

 Dugang pa niya nga matibhangan ang ilang kustomer sa pagsugod sa klase tungod kay ang mga kabataan nga mga tinun-an  dili na man nila pasudlon gawas lang sa adlaw nga Sabado, Domingo ug mga adlaw nga holiday.

Gitataw niya nga daan na nilang gihimo sa miaging tuig ang pagdili pagpasulod sa mga tinun-an nga  igo  lang  magdula og computer game tungod higpit man kining gidili sa kagamhanan.

Sayo  niini gihigpitan ni Mayor Jonas Cortes ang  pagpatuman sa ordinansa nga nagdili sa mga tinun-an sa pagsulod sa internet coffee sa mga adlaw tingklase.

Gawas  niini  higpit  usab  nga ipatuman  ang curfew ordinance nga nagdili sa kabataan sa dakbayan sa pagsuroy   gikan  sa alas 10:00 ang takna sa gabii hangtod sa alas 4:00 ang takna sa kaadlawon.

Gitahasan sa higpit nga pagpatuman sa maong ordinansa sa dakbayan ang mga opisyal  sa barangay kinsa kutob  sa hidakpan adto  itanggong  sa  barangay hall ug ipatawag ang ginikanan o guardian sa mga minor de edad nga ilang madakpan. WC (BANAT NEWS)