JVR nalandig sa tambalanan

CEBU, Philippines - Nalandig sa tambalanan ang bag-ong napiling mayor sa dakbayan sa Talisay nga si Johnny Delos Reyes tungod kay giingong mihubag ang tuhod niini.

Base sa report nga giingong si Delos Reyes, 60-anyos naglisod sa paglakaw tungod sa matag-tiki sa iyang tuhod hinungdan nga nagpa-admit kini sa Miller Hospital sa dakbayan sa Sugbu. Ang maong report gikompirma sa iyang asawa  nga si Myrna Delos Reyes.

Ang ginang nga nahinabi sa mga tigbalita kagahapon sa buntag pinaagi sa telepono mibutyag nga duha na ka adlaw nga na-admit sa maong tambalanan si JVR tungod sa matag-tiki sa wala niining tuhod.

Matud niya mihubag ang tuhod sa iyang bana ug maglisod kini sa paglakaw ug gihilantan.  Ang mga anak sa magtiayong Delos Reyes gibati og kabalaka ug maoy miaghat sa ilang amahan nga magpa-admit lang sa tambalanan.

Hinuon matud sa ginang walay angayang kabalak-an ang mga Talisaynon sa  panglawas sa bag-ong mayor sa Talisay. Midugang siya nga posibleng epekto lang kini sa stress tungod sa pangampanya sa milabay’ng eleksiyon ug gitambagan sa iyang doktor nga papahuwayon lang una. (BANAT NEWS)