Degamo di supak sa tuition fee increase

CEBU, Philippines - Dili supak si Dr. Marcial Degamo,  hepe  sa  Quality Assurance and Accountability Division sa Department of Education (DepEd) 7 sa pagtaas sa mga matrikula sa mga pribadong tunghaan dinhi sa Central Visayas.

Matud ni Degamo nga misaka karon ang mga bayranan sa mga estudyante tungod kay  patas-an  usab  ang  suweldo sa mga magtutudlo sa maong   mga tulunghaan ug  aron  ikapamalit  usab  og  dugang  mga pasilidad

Giklaro ni Degamo nga maglisud ang mga pribadong tunghaan kung dili nila patas-an ang ilang matrikula tungod kay adunay posibilidad nga mamahawa ang ilang  mga  magtutudlo ug mamalhin ngadto  sa  eskuylahan  sa goberno.

Giklaro ni Degamo nga ang tuition fee mao ang matrikula nga bayranan sa mga estudyante samtang ang other fees gilangkuban sa miscellaneous ug   ang  athletic fee.

Gipahibawo hinuon ni Degamo nga  wala  molapaw sa 10 porsento ang gipasakang  matrikula sa mga pribadong tunghaan. Apan ang uban  mipasaka og 25%  tungod kay lima hangtud napulo na kini ka tuig nga wala sila mopasaka sa ilang bayranan.

Matud ni Degamo nga adunay 700 ka mga pribadong tunghaan  sa  Central Visayas apan 12%-15% lang ang mi-apply og  tuition fee  increase.

Dinhi  sa Sugbo mokabat sa 120 ka tunghaan  ang mipaumento sa  bayranan.

Karong  Hunyo 3 buksan  na  ang  klase  ug matud ni Degamo nga andam na ang ilang departamento   alang  niini.

Gani, karong semanaha  gipatambong ang mga maestro ug mga maestra  sa  seminar isip preparasyon sa K to 12 nga programa.

Ang K to 12 program gihimo aron dili  biya  ang edukasyon  dinhi sa Pilipinas itandi  sa ubang  nasud  sa   gawas .

Samtang  gihangop  usab   ni Degamo  ang  kasayoran  bahin  sa  ipatukod  nga  mga  edipisyo  nga  may 600  ka  mga lawak  klasehanan  dinhi  sa Central  Visayas.

Midugang  siya nga  mao kini  tubag  sa  suliran  nga  dugay  na  kaayong  gisagubang  nilang  mga  opisyal  sa DepEd.  (BANAT NEWS)