Puya gipaanod sa sapa sa Tejero
CEBU, Philippines - Pito ka buwang puya nga gituohang gitaktak gikan sa sabakan sa inahan ang nakaplagan didto sa dan T. Padilla, Brgy. Tejero syudad sa Sugbo sa buntag kagahapon.
Ang nakakita sa puya mao si Siegfredo Prieto Gagani Sr., 61, usa ka street sweeper ug molupyo sa Villagonzalo II, Brgy. Tejero syudad sa Sugbo.
Matud pa nga nanglimpyo sa sapa si Gagani nianang tungora dihang nabantayan niini ang usa ka puti nga plastic nga naglutaw sa tubig maong iyaha kining gikuha gamit ang scoop net.
Sa dihang anaa na sa yuta ang plastic bag nakita niini nga may misiwil nga tiil maong iyaha kini dayong gihiling sa sud ug didto niya nadiskubrehan nga puya diay kini ug patay na. Si Gagani daling misumbong kang barangay kagawad Ian Arago kinsa mao say mitawag sa kapolisan.
Nagpadayon karon ang imbestigasyon sa Homicide Section pinangulohan ni SPO1 Victor Ruel Ayuman.
Nasuta nga lalaki ang puya nga gibanabanang pito pa ka buwan ug nagsugod na og kadugta. (BANAT NEWS)
- Latest
