Suspek sa pag-kidnap sa Korean ug uyab niini nakapiyansa
CEBU, Philippines - Gitugutan sa korte nga makapiyansa si Song Sung Heum ug tulo ka kauban niini nga Filipino nga gipasakaan og kasong kidnapping for ransom nga usa ka kasong dili unta mahimong kapiyansahan.
Kahinumduman nga niadtong October 24, 2012 gidakop ang tulo ka Filipino nga sila si Leonardo Bulabon, Richard Dealagdon ug Gregorio Dealagdon sa mga sakop sa Anti-Kidnapping Group-Visayas sa usa ka mall sa Cebu City.
Sila maoy gipasanginlang mi-kidnap sa manag-uyab nga sila si Jun Hyung Chung, usa ka Korean ug Filipina nga si Charise Santiago.Matud sa mga reklamante gi-kidnap sila sud sa ilang panimalay sa Barangay Lahug ug gipugos sa pagpasakay sa usa ka sakyanan.
Gitumbok nga mastermind sa grupo mao si Heum. Si Heum nadakpan sud sa Mactan Cebu International Airport pag-abot niya gikan sa Korea.Si Judge Ma. Lynna Adviento sa Regional Trial Court nagkanayon nga iyang gitugotang makapiyansa ang upat tungod sa kahuyang sa mga ebidensya sa prosecution batok sa mga akusado.
Matud niya ang mga ebidensya sa prosecution karon, dili paigo aron makombikto ang mga akusado.
Ang korte mimando sa mga akusado nga mobayad og piyansang P100,000 matag usa, apan sila si Heum, Bulabon ug Gregorio lang ang nakapiyansa ug nagpabilin sa Cebu City Jail si Dealagdon. (BANAT NEWS)
- Latest
