Tungod sa umaabot nga ting-ulan DOH miawhag sa tanan nga manglimpyo

CEBU, Philippines - Gipahimangnoan sa Department of Health ang publiko bahin sa kampanya kontra sakit nga dengue nunot ning nagsingabot nga ting-ulan.

Sumala pa ni Regional Epidemiology Surveillance Unit (RESU) 7 chief, Rennan Cimafranca, ang pagpanglimpiyo kanunay sa palibot maoy usa sa mga pamaagi batok sa lamok nga nagdala og sakit.

Si Cimafranca miingon nga karong taliabot na ang tig-ulan labing maayong buhaton mao ang pagpanglimpyo nang daan sa palibot.

Kini aron mahipos ang mga basura sa mga kanal nga moresulta sa pagbaha, pagpanghipos sa mga botelya , mga ligid ug lata nga posibleng maitlogan sa mga lamok nga magdala og sakit nga dengue.

Subling gipahinumduman ni Cimafranca ang publiko sa “4 S Program” sa DOH nga nagpasabot Search and destroy, Seek early treatment, Self-protection measures ug  Say no to indiscriminate fogging.

Nag-una sa listahan nga dunay daghang kaso sa nasakit og dengue ang Cebu City, sunod ang Lapulapu City, Carcar City ug Talisay City. (BANAT NEWS)