Armas nga nakapatay ni Oybenes ug luage usa ra

CEBU, Philippines -  Nagpabilin ang tanghaga kun asa gipusil si Rohama ‘Ramram’ Luage kini human nag-negatibo si Luage sa gunpowder residue atol sa gihimong awtopsy ug paraffin test.

Sa paraffin test nga gihimo sa medico legal nga si Dr. Nestor Sator ngadto kang Ramram, negatibo ang resulta niini sa gunpowder apan ang kapitan nga si Rey Oybenes nag-positibo, usa sa mga  timailhan nga nakapabuto siya sa armas.

Migawas usab sa ballistic examination ug crossmatching sa ilang mga nakuhang kabhang ug deformed slugs sa crime scene nga mitakdo kini. Si Sator miingon nga ang na-recover nga kabhang sa armas nga gigamit ni Oybenes nag-match sa ilang na-recover nga deformed bullet sa lawas ni Luage atol sa gihimong crossmatching.

Samtang gipasabot usab ni Sator nga ang igo ni Oybenes sa dughan hilabihan nga kadako, gani ang kasing-kasing niini dunay dako nga buslot. Matud pa ni Satur ang kasingkasing usab ni Luage naigo usab sa bala. Gipasabot ni Satur nga bisan pa man og nadali sa pagdala sa tambalanan si Oybenes, dili gihapon kini mabuhi tungod kay ang igo usab niini dul-it man kaayo.

“Considering nga pwerteng gubaa sa ilang kasing-kasing kay ang gigamit man gud nga bala mura’g ‘hollow point’(ang bala) mo-umbrella man gud na sa ilawom, mao to nga pwerteng dakoa og  lungag ang ilang kasingkasing which can cause instantaneous death," sumala pa sa eksplinasyon ni Satur.

Matud  usab ni Satur nga nagtakdo sa crossmatching ang bala nga na-recover sa lawas nilang Oybenes ug Luage nga pulos gikan sa na-recover nga  armas nga Norinco caliber .45 nga giingong iya sa kapitan.

Nasuta usab ni Satur nga ang samad pinusilan ni Oybenes padung sa ubos ang direksyon, parehas kini sa igo ni Luage.

Samtang ang hepe sa kapolisan sa dakbayan sa Sugbo, Sr. Supt. Mariano Natuel Jr. mipadayag nga 99% pa lang nasulbad ang kaso nilang Oybenes ug Luage.

Sumala pa niya nga ang nahibiling uno porsiyento mao na lang usab ang pagsubay kun diin gyud gipusil patay si Luage.

“Kay naa na man ang paraffin test ug cross matching sa bullet, so we can therefore say nga 99% na ang atoang conclusion but ang atoa lang karon sa kapulisan kung asa dapit gipusil si Rohama," pasabot pa ni Natuel.

Hinoon, gipadayag ni Natuel nga ang buhatan sa Homicide Section, mihimo na karun sa tanang imbestigasyon aron masayran kun asa gyud gipatay si Luage.

Kahinumduman nga niadtong Huwebes sa buntag, pasado alas-10 sa milabay’ng semana nakit-an si Oybenes nga nagguyod sa patay’ng lawas ni Luage nga iyang gilabay diha sa may Transcentral Road sa barangay Cansumoroy sa lungsod sa Balamban.

Human makadawat og taho ang kapolisan, giingong dali usab nilang gigukod si Oybenes ug nianang pagkahapon pasado alas 4 didto na mapalgi ang iyang gisakyan nga gray Toyota Hi-lux nga hinatag sa kagamhanan sa dakbayan sa Sugbo diha sa barangay Mabini, apan patay na kini. (BANAT NEWS)