Natulog sa lantay gipusil patay
CEBU, Philippines - Patay diha-diha ang usa ka ulitawo human kini pusila samtang natulog didto sa Sitio Ibabao Brgy. Pusok dakbayan sa Lapulapu kagahapon sa buntag.
Ang biktima giila nga si John Carlo Obayan, 20, ulitawo, residente sa maong dapit.
Base sa pasiunang imbestigasyon ni PO3 Lydo Pinos sa Lapulapu City Police Station nasayran nga si Obayan uban ni Alvin Estomago, 21, ulitawo nga iyang silingan nga natulog sa usa ka lantay sa usa ka bakanteng lote sa dapit nga nahitaboan.
Sa alas 6:30 kagahapon sa buntag nakurat si Estomago sa milanog nga buto sa usa ka armas duol sa ilang nahimutangan ug sa pagbangon niya maoy iyang nakita nga ang iyang katapad nga si Obayan nga naigo sa bala. Matud pa ni Estomago nga human pusila ang biktima gikuha sa kriminal ang tabon sa nawong niini aron sa pagsiguro nga patay kini .
Wala makaila si Estomago sa namusil kay nagsul-ob kini og full faced helmet ug luwan sa usa ka motorsiklo nga giparking sa dapit nga dili layo sa nahitaboan.
Atol sa imbestigasyon si Ruben Obayan maguwang sa biktima mipadayag nga nalambigit sa mga kalihukang binugoy sa mga batan-on ang iyang igsoon apan wala kini masayod kung sakop ba kini sa “bloods gangâ€.
Apan si Estomago mipadayag nga mogamit og ginadiling drugas si John Carlo ug kanunay kining maghinuktok.Nagduda si Ruben ug Estomago nga dunay gihambing problema ang biktima apan wala kini mosulti ngadto kanila.
Gumikan niini ang kapolisan padayon sa pag-imbistigar sa maong hitabo ug nagduda sila nga pagdumot ang hinungdan sa maong pagpamusil kay mao ra man kini ang gituyo pagpusil. (/WC) (BANAT NEWS)
- Latest
