Sundalo nang-harass sa nagtukod og balay

CEBU, Philippines - Gikatakdang pasakaan og kasong administratiba diha sa Ombudsman for the Military ang upat ka mga sundalo sa Central Command tungod sa pasangil nga nang-harass sila og tulo ka mga sibilyan niadtong Mayo 18 sa sitio Groto sa barangay Apas.

Giila ang mga sundalo nga sila si Sgt. Gregorio Lazo, Sgt. Pableto Bongcawel, Master Sgt. Vicente Palo ug ingon man ang ilang opisyal nga usa ka Col. Ireneo Balucan nga nadestino sa Central Command.

Ang maong mga sundalo gireklamo na og kasong malicious mischief ug obstruction of justice ug laing obstruction of justice by induction batok sa koronel diha sa Cebu City Prosecutors Office.

Ang reklamante mao si Jeanipher Amante, molupyo sa Brgy. Apas ning syudad, Armando Sanggutan, stay-in carpenter ni Amante ug ang 15-anyos nga anak ni Sanggutan, molupyo sa dan P. Del Rosario ning syudad. Base sa imbestigasyon kalit giguba ni Lazo ug Bongcawel ang gate sa gitrabahong balay nila ni Sanggutan nga gipanag-iya ni Amante. Matud pa gitulisok ug gibaharang patyon ni Lazo si Sanggutan kung magpakita pa kini sa lugar.

Dugang pasangil nga si Bongcawel kinsa daling nakaikyas giingong mipabuto pa og wala matinong kalibre sa armas. Si Amante mitawag sa kapolisan hinungdan sa pagresponde sa mga sakop sa Special Weapons and Tactics nga gipangulohan ni PO3 Arthur Sabang nga miresulta sa pagkasikop ni Lazo kinsa naabtan sa lugar.

Sumala pa nga pagkasunod adlaw Mayo 19 , usa ka Master Sgt. Palo ang miduol kang Amante ug nangayo og pabor nga ipa-turnover sa kostudiya sa Centcom si Lazo hinungdan nga nabalhin ang naulahi sa Centcom gikan sa Mabolo Police Station, apan uwahi nang nasayran ni Amante nga dili unta kini mahimo.

Base sa affidavit ni Amante, si Balucan kinsa maoy opisyal sa mga sarhento miadto sa ilaha ug giingong nasuko nga nagtukod sila og balay sa lugar nga wala’y pananghid sa Central Command tungod kay kini kabahin sa military reservation, matud pa nga gibaharan siya ni Balucan nga ‘padad-an’ og tawo kung di hunongon ang konstruksyon. (BANAT NEWS)