Briton, babaye sikop tungod sa ‘baklas’ nga passport

CEBU, Philippines - Gidakop sa mga sakop sa Bureau of Immigration and Deportation ang usa ka British national ug kauban niining Filipina sud sa International Departure area sa Mactan Cebu International Airport (MCIA) sa milabay’ng gabii.

Ang nasikop mao sila si Timothy Mark Fendings, 41, usa ka British national ug Cecile Besamis, 26, residente sa Brgy. Guadalupe dakbayan sa Sugbu ug kasamtangang nagpuyo sa usa ka hotel sa dakbayan sa Lapulapu.

Ang duha gidakop tungod kay nasakpang ‘baklas’ ang passport sa babaye tungod kay dili kang Besamis ang maong passport.

Sa pasiunang imbestigasyon sa BID nasuta nga mga alas 11:50 sa milabay’ng gabii miabot si Fendings ug Besamis sa tugpahanan alang sa ilang flight ngadto sa Singapore.

Pag-abot sa BID lane sud sa International Departure area nasuta sa teller nga peke ang passport ni Besamis hinungdan nga kini gipadakop sa duty police sa maong area.

Matud pa ni BID-MCIA Alien Control Officer Atty. Brandon Enad kasong “Human Trafficking” ang ipasaka batok kang Fendings kung mapamatud-an nga aduna siya’y kalambigitan sa pagpeke sa passport ni Besamis.

Si Fendings ug Besamis anaa karon sa kustodiya sa kapolisan sa dakbayan sa Lapulapu samtang padayon pa ang imbestigasyon sa mga sakop sa BID. Nasuta nga ang passport iya sa gibuwagang asawa sa maong Briton ug gitangtang lang ang pangalan ug litrato niini ug giilisan sa pangalan ug litrato ni Besamis. (BANAT NEWS)