Managsilingan nagtinigbasay pulos nangasamdan

CEBU, Philippines - Grabeng naangol ang duha ka tawo nga naglalis nga misangko sa pagtinigbasay alas-2 pasado ang takna sa hapon sa miaging adlaw sa barangay Sabang, dakbayan sa Danao.

Si PO2 Roselo Campo nga nahinabi sa Banat News miila sa duha nga grabeng naangol nga mao sila si Dionesio Lawas, 57, ug Solatiano Jaime, 66, pulos nagpuyo sa maong dapit.

Matud pa ni Campo nga dugay na nga nagkabikil ang managsilingan ug nagsinukmatay dihang nagkatagbo sa maong adlaw.

Sa mao nilang panaglalis  wala makapugong sa iyang kaugalingon si Jaime ug miibot sa gitak-in nga sundang ug gitigbas si Lawas sa makadaghang higayon nga nakaingon sa pagkasamad sa kalawasan ug bukton niini.

Si Lawas bisan nasamdan daling mikuha og sundang ug diha na ang pagbawosbawos nila og tinigbasay nga nakaangol usab kang Jaime. Ang duha pulos gidala ngadto sa Danao Provincial Hospital ug gibalhin sa Vicente Sotto Memorial Medical Center sa dakbayan sa Sugbo. (Romeo T.  Limpangog ug Kristianne  Marie Alcaria,CNU Intern/EIM)