Traysikol gimaneho og 16-anyos nabangga sa bus, upat naangol

CEBU, Philippines - Upat ang angol atol sa nahitabong panagbangga tali sa usa ka D’Rough Riders Bus ug traysikol nga gimaniho sa usa ka menor de edad nga wala say lisenya sa miaging adlaw sa subidahong dapit sa Brgy. Ilihan Tabogon alas-4 sa hapon.

Giila ang angol nga drayber sa traysikol nga si Frietz (ngalan nga gipugngan), 16, samtang ang mga pasahero niya mao sila si Roberto (ngalan nga gipugngan), 17, Jack Lord Tumulak, 31, minyo, ug Mark Tumulak, 22, pulos mga residente ang upat sa Brgy. Libjo, Tabogon.

Samtang ang drayber sa bus nailhan usab nga si Artemio Precilas, 47, minyo, ug residente sa Brgy. Goyong, Tabogon.

Sa inisyal nga imbestigasyon ni SPO1 Derrick Inot sa Tabogon Police Station gikan ang bus sa dakbayan sa Bogo samtang ang traysikol padulong sa Brgy. Ilihan gikan sa Brgy. Libjo, Tabogon ug pag-abot sa nahisgutang dapit nagkadinasmagay.

Matud pa nga kusog ang dagan sa traysikol tungod kay naglihay sa lubak-lubakong dalan ug milapas na hinuon kini sa center lane hinungdan sa pagkabangga sa bus nga gikasugat.

Tungod sa kakusog sa impact sa panagbangga maayong pagkabuak  sa atubangang bahin sa winshield sa bus ug sa walang suga samtang ang walang parte niini nadaot usab. Hinuon, gikataho nga wala’y nadisgrasya sa mga pasahero sa bus.

Ang mga naangol daling gidala sa Don Verallo Hospital sa dakbayan sa Bogo apan gidali kini pagbalhin sa VSMMC (Vicente Sotto Memorial Medical Center) sa dakbayan sa Sugbo. (BANAT NEWS)